Zondig 8 fibberwari, tradisjoneel de waek veur Vastelaovend, trèk vanaaf 13.33oere de Kènjeroptoch door de sjtraote van de Zittesje bènnesjtad. De Kènjeroptoch is taeves de offesjeel intoch van Sjtadsprins Rik I. Es de waergode de Zittesje kènjer goud gezind zeen belaof ’t weier eine geweldige daag te waere, wobie väöle doezende luuj de waeg nao Marotte-sjtad Zitterd weite te vènje.
De nao verwachting doezende luuj langs de kantj kènne geneite van grote groppe van sjoole en buurte, mit soms mee es honderd deilnummesj, klein groppe van kenjer, femiejes en humorvolle köppelkes en enkelinge. De neudige hermenieje en zaate hermeniekes zulle zörge veur de muzikaal Vastelaovesklanke.
Deilname:
Jeederein kènt en maag deilnumme aan de Kènjeroptoch. Waal verzuik ’t Optoch Kommitee Zitterd deilnummesj om zich veuraaf aan te melje via ’t digitaal aanmeldjformuleier op de website van Optoch Kommitee Zitterd. Nao insjrieving krig geer automatisch via email ein bevestiging. Aanmelje veur deilname kènt pès vriedig 6 fibberwari, 17.11 oere.
-> Aanmelje veur deilname aan de Kènjeroptoch 2026.
Route
De Kènjeroptoch vertrèk om 13.33oere vanaaf ’t Maaslandpark en trèk vervolges via de volgende route: Riekswaeg Noord – Walramsjtraot – Euverhaovenersjtraot – Sjteivig – Veursjtad – Brandsjtraot – Lömmerichersjtraot – Begienehaofsjtraot – Daeke Tijssesjtraot – Kloosterplien – Auw Mert – Mert – Lömmerichtersjtraot (bie de sjtadspomp lènks aaf) – Meulebaeksjtraot – Nuujsjtraot – Plaksjtraot – Pötsjtraot – Mert (ontbènjing).
Nao aafloup van de Kènjeroptoch is op de Mert de tradisjonele appelesieneraege wobie Sjtadsprins Rik I honderde appelesiene zal oetsjmiete nao de mechelkes en sjnaake.
Priesoetreiking
Aansjloetend aan de Appelesieneraege waere door de Optochsjurie op ’t podium op de Mert de Prieze van de Kènjeroptoch bekend gemaak. De Ere Wimpels en sjpisjaal prieze zulle door Sjtadsprins Rik I en Vorst Marot Joep I op ’t podium waere oetgereik. Naeve de Eere Wimpels en Prieswimpels in de versjèllende kattegrieje zeen d’r sjpisjaal prieze veur ‘Sjoonst verkleide Mechelke en/of Sjnaak’. Dit jaor is ouch weier de sjpisjale femiejepries ‘De Gouwe Paplaepel’ te wènne veur auwwesj of opa’s en oma’s die same mit hun (klein)kènjer mittrèkke in de optoch.
Naeve de optochsjurie, geit ouch weier de Kènjersjurie aan de sjlaag. Dees besjteit oet acht sjoolgaonde kènjer. Same mit de sjurie beoordeile zie de deilnummende kèrkes. Daonaeve reik de Kènjersjurie ouch de sjpisjaal prieze ‘Sjoonst verkleid Mechelke’ en ‘Sjoonst verkleide Sjnaak’. Aan de wènnesj van dees sjpisjaal prieze reik de kènjersjurie ein eige kènjersjurie vaenke oet.
Geplaatsj: 2 Jannewari 2026
Update: 13 jannewari 2026
Bron: Optoch Kommitee Zitterd
Foto’s: RBZitterd / VastelaovendZitterd