Benuimp pés Sjtadsprins van Zitterd 2020 is d’n heer Thierry Dirkx. Ziene Hoogheid zal regeiere euver ’t Marotteriek en d’n eeuwen-awwe Zittesje Vastelaovend onger de naam Sjtadsprins Thierry I.
Perseunlikke gegaeves:
Thierry Dirkx is gebaore op 7 november 1993, zien Prinselik palies lègk aan de Karel van Bronckhorstlaan in Obbeeg.
In ’t dagelikslaeve sjtudeiert Thierry aan de Pabo in Zitterd. Hae wèlt zo in de voutsjpaore van zien pap traë. Hae is noe 2e jaor sjtudent en haet onlangs offesjeel zien propedeuse gehaold. Vanoet zien Pabo-opleijing mot hae natuurlik ouch stage loupe. Momenteel löp hae stage op basissjool Loedoes in Hoogveldj. Wat zulle zie es sjool greutsj zeen om de Sjtadsprins in hoes te höbbe.
Thierry haet ’t letste jaor van de basissjool in Mezeik gedaon, wonao hae ouch in Mezeik nao de middelbare sjool ging. Zien passie om luuj te helpe, leit häöm verpleegkunde gaon sjtudeiere aan de PXL in Hasselt. Nao drie jaor sjtudeiere, stageloupe en zjwoege, is hae tot inzich gekomme dat dit toch neit waar waat hae oeteindelik gaer zaw wèlle.
Om zich get te kènne veroorlove op finansjeel gebied, haet hae op zaoterdige en in vakasies op versjèllende plaatsje gewirk. Momenteel wirk hae op zaoterdig bie Only & Sons heremode es verkuiper. Thierry woont nog bie zien awwesj in Obbeeg, al is hae de letste maonje waal väöl oppe Sjteivig in Zitterd te vénje.
Hobby’s en vereiniginge:
Thierry is opgegruijt mit meziek en kump oet ein muzikale femieje,
wo jeeder femiejelid ein insjtrument besjpeeld. Es jeederein nog in bed lègk en
Thierry vruig mot opsjtaon, is jeederein geliek wakker, omdat de “aria’s” al
oet vanoet de douche klinke.
Same mit Maxime Tummers vormp Thierry ’t zangkduo Sjtóm Toeval. Thierry haet de
passie om Sjtóm Toeval in gans Limburg oppe kaart te zétte.
Thierry is eine grote fan van Harry Potter. Alle films haet hae al mènnigmaol
bekeke. Same mit zien pap René geit hae reigelmaotig nao Londen en dao bezuik
hae dan altied de winkel van Harry Potter. De touversjtek haet hae al in zien
bezit, ziene grote wunsj is om ooit de Nimbus 2000 te bemachtige. Parallel hie aan
is ’t verzamele van Lego. Hae haet väöl Lego in al die jaore verzamelt, die is
te bewonjere ein eine vitrinekas.
Thierry haet jaore klarinet gesjpeeld in de hermenie van Obbeeg. Ondanks dat
thoes weinig woort gerippeteiert, waar jeederein verbaas waat hae oet zien
klarinet koosj touvere. Vanaaf kleine jong, dae amper koosj kalle, is Thierry
gefascineierd door auto’s. Hae kon es 4-jaorige alle automerke herkinne en benuime.
Dit is nog ummer ein aafwieking van häöm. Ziene favoriete auto is al jaore de
Aston Martin.
Al heel get jaore haet Thierry ein sezoenskaart van Fortuna Sittard. Same mit
zien vrunj bezuik hae alle thoeswedsjtrieje van zien club. Pap en mam motte
häöm waal altied op ’t hart drökke om neit te väöl te sjreewe, wènt zien sjtum
mot gesjpaard blieve. Thierry deit aan fitness bie Basis-Fit in Zitterd en haet
jaorelangk basketbal gesjpeeld bie BC de Bumpers in de Sjtadssjporthal. Mit ein
appelsien sjmiete zal häöm dus zeker gaon lukke.
Vastelaovend:
Mit Vastelaovend is Thierry mit gezin of mit vrunj
in de Zittesje bènnesjtad te vènje. Thierry haet geine alcohol neudig om
Vastelaovend te viere, al lös hae zeker waal ein glaeske beier. ’t Leifste
drènk hae sjpisjaal beier oet ein biepassend glaas. De kas van mam en pap sjteit
dan ouch vol mit versjèllende beierglazer van Thierry.
Jeederjaor bezuik Thierry same mit zien naef Joeri de optochhal. Hae is
gefasineierd door de motto’s en de kunde womit de waages waere geboewd.
Es klein menke haet hae mit Vastelaovend in Kafee De Kup aan de toenmalig Vors
Marot Ben I gevraog of hae Sjtadsprins koosj waere in ’t Marotteriek. Vors
Marot Ben I haet zien tillefoonnòmmer op ein beierviltje gesjreve en häöm
belaof te belle es hae auwt genog zou zeen. Zou hae ’t beierviltje nog höbbe
bewaard?
Thierry haet versjèllende kere mit de Groote Optoch mitgeloupe. Soms mit de fanfaar, mèr ouch mit de Buurt Sjteivig. De Vastelaovesmès van de Klaeverte op ’t Trevianum zal hae nootsj euversjlaon. Nao ’t Kanon van ’t Balkon wurt ’t meistal laat, mèr hae zal de volgende mörge altied in de mès aanwezig zeen. Dat ziene pap al mee es 25jaor leidjes in de mès zengk, begeleid door nonk Paul, sjpeelt dao natuurlik ouch bie mit. Zelf haet Thierry ouch al versjèllende maole in de mès gezonge.
Thierry is geine onbekende in Zitterd en in Limburg. Al versjèllende maole haet hae same mit Maxime Tummers es ’t duo Sjtóm Toeval mitgedaon aan ’t Zittesj Vastelaovesleidjes Konkoer. Veurigjaor höbbe zie mit ’t leidje ‘1, 2, 3 Vastelavend’ ’t ZVK gewonne en sjtonge zie in de finale van ’t LVK in ’t MECC. Es zenger sjteit Thierry ouch solo op de Limburgse podia. Zien Limburgstalige leidjes passe op feeste door ’t jaor haer, mèr zeker ouch op aktiviteite in de Vastelaovestied.
Thierry haet meerdere maole gevraog of ’t neit muigelik waar om mit ’t gezin korter bie Zitterd te gaon wone. ’t Waorom waar duujelik: hae dach dat ‘t angesj neit muigelik zou zeen om Sjtadsprins te waere… De Prinsedruim van Thierry woort veurigjaor nog èns bevestig toen hae oppe mert waar en taege ziene naef Joeri vertelde dat hae de volgende Vastelaovend de plaatsj van Sjtadsprins Rob I zàw innumme. Dit zonger te weite dat dit dit jaor wirkelikheid zàw waere.
Femieje:
Vader: René Dirkx
Gebaore op 2 juni 1957 in Zitterd en opgegruijt in Zitterd.
Op 9 jannewari 1882 getrouwt mit Monique Dirkx-Kalkhoven. René haet Monique lere kènne toen ze same mit hun respectievelikke moodesj ’t consultatiebureau bezochte. Ongerein trooste bie ’t bäöke veur eine prik haet de vonk waarsjienlik doon euversjlaon.
René wirk al 40jaor op ein sjool veur voortgezet speciaal ongerwies in Zitterd, ein unicum.
Naeve zien wirk is René veural mit bezig mit meziek. Hae haet bienao 40jaor tuba gesjpeeld bie fanfare St. Barbara Sanderbout-Zitterd. Daonaeve sjpeelt hae gitaar en is zènge ziene groote passie. René haet al väöle leidjes gezonge op Marotte CD’s. Dit jaor won hae ’t Zittesj Vastelaovesleidjes Konkoer en zal ‘t leidje ‘Mènnigmaol roup ich Alaaf!’ ’t liefleid van Thierry es Sjtadsprins zeen. Get om greuts op de zeen! Mit dit leidje haet hae dit jaor de hauf-finales van ‘t LVK bereik. In 2016 sjtong René mit ’t leidje ‘’t Sjoonste feeske van ’t jaor’ in de finale van ’t LVK.
Mooder: Monique Dirkx-Kalkhoven
Gebaore op 30 Meert 1958 in Zitterd
Is opgegruijt in ’t centrum van Zitterd en later in Lömmerichterveldj. Woont al mee es 38 jaor same mit René in Obbeeg.
Pès ein paar waeke geleje haet zie gewirk bie ein damesmodezaak in Zitterd. Eerder haet zie gewirk es laborante in ’t ziekehoes in Zitterd en later es verkuipster bie parfumerie en drogisterie ‘De Salamander’ in Zitterd.
Monique is ein richtig femiejeminsj Mit ’t ganse gezin en aanhangk op vekans gaon, kiek zie ’t ganse jaor nao oet. Häör favoriete vekaselandj is Eusteriek en Monique kalt dan ouch ’t dialek van de Tirolesj.
Monique haet jaore accordeon gesjpeelt in ’t accordeonorkes Gelaen. Zie haet 25jaor saxofoon gesjpeelt bie fanfare St. Barbara Sanderbout en later bie hermenie Concordia in Obbeeg.
Zóster Fabiënne Dirkx
Gebaore op 19 November 1997
Haet al mee es 4jaor ein relase mit Wout oet Beeg (Grevenbicht). Sjtudeiert
hbo-verpleegkunde aan de PXL in Hasselt en wirk op zaoterdig bie bekkerie
Cornelissen.
Fabiënne sjpeelt al zo’n teen jaor hobo bie de hermenie van Obbeeg. De
diploma’s t/m D haet zie ein paar jaor geleje mit ein super rizzeltaat behaold.
Doordat häöre vrunj Wout lid is van sjötterie Eendracht oet Beeg haet Fabiënne
zich dao ouch aangemeldj. Op sjtraot sjleit zie oppe dikke trom en oppe wei
deit zie mit aan ’t sjeite. Zelje dat zie ein bölke haet gemis.
Fabiënne haet es hobby alles wat te make haet mit make-up, naegel sjtiele en
lichaamsverzörging. Väöle YouTube filmkes mit dit ongerwerp waere daon ouch
bekeke.
Vrundjin Evie Engelen:
Gebaore op 26 Oktober 1994 in Zitterd. Zie is wirkzaam bie de Rabobank, facility services en volg ein aovendsjtudie facilitymanagement.
Evie is totaal neit muzikaal, mèr zengk waal alle Vastelaovesleidjes mit.
Vanaaf häör 7de laevesjaor is zie lid van scouting Don Bosco, hief geef zie leijing aan de jonges van 11-14 jaor. Evie is ein richtige Oktoberfees leifhöbber, zie is dan ouch altied alle daag prezent.
Vastelaovend is ouch ein van häör favoriete bezighede. Zie wèlt dan dat alles mit häör vrundjinne pès in de puntjes is gepland (kleijaasj, tiedsjtippe, wo….). ’t Is dan ouch neit gek dat Evie en Thierry zich tiejes de Vastelaovend in Zitterd de eesjte keer ontmoet höbbe.
Bron: De Marotte Zitterd
Foto’s: De Marotte Zitterd / Ton Dirkx / Studio Hellenbrand