Rob Goossens benuimp pés Sjtadsprins van Zitterd

Benuimp pés Prins Carnaval 2019 van Zitterd, d’n heer Rob Goossens. Ziene hoogheid geit regeiere euver ’t Marotteriek en d’n eeuwen-awwe Zittesje Vastelaovend onger d’n naam Sjtadsprins Rob I.

Rob Goossens is gebaore op 22 juli 1988, zien Prinselik palies lègk aan de Dr. Poelslaan 10 in de Zittesje buurt Ophaove. In ’t dagelikslaeve wirk Rob es Marketing Specialist bie de regionale omroup L1.

Rob is leerling gewaes aan de ABC sjool in Munstergelaen. Daonao haet hae op ’t Trevianum gezate wo hae zowaal zien HAVO es VWO diploma behaolde. Hae is greutsj dat hae ein van de letste lichtinge is gewaes die nog les höbbe gehad op de Serviam-lokase in de bènnesjtad. Nao de middelbare sjool sjtudeierde hae Commercieel Management aan de HEAO in Zitterd.

Hobby’s en vereiniginge
Rob is oprichter en veurzitter van de Zittesje Vastelaovesklup ‘CV ’n Bietje Wiejer’, womit hae jaorliks mitlöp in de Groote Vastelaovesoptoch en verzörge zie jaorliks ein optraë op de Vrouluujzitting van de Flanelle Lepkes. De CV besjteit noe zo’n 6 jaor en is ontsjtange oet de gezamelikke leifde veur de Zittesje Vastelaovend en de sjtad Zitterd.

Rob is saer ein aantal jaore ouch ongerdeil van de grop ‘Mit pien en muite’, die jaorliks de Mansluujstehung in kafee Schtad Zitterd organezeiere. Rob haet de stehung ouch tweemaol geprizzenteiert.

Saer 2014 is Rob lid van de PR-kemissie van De Marotte Zitterd. Hie is hae onger mee verantjwoordelik veur de e-nuutsbreive, sjrif hae artikele en maak hae advertensies op. Tössje 2014 en 2017 waar hae ouch lid van de Pappegey-kemissie, woveur hae artikele sjreef. Ouch veur de Zittesje revuu ‘Oppe Tied’ haet Rob PR wirkzaamhede verzörg.

Zien sjtamkafee in de sjtad is Schtad Zitterd. Es lid van de sjpaarklup is dat ein gouw rae om mit reigelmaot zien naas te laote zeen in ’t kafee oppe Mert. Veur en sjpisjaal beier geit hae ouch gaer nao Tapperie de Gats en om ein feeske te boewe nao Ich & Dich. Zeker mit de Vastelaovend is hae ouch te vènje bie ’t Sjterfhoes of De Kup.

Zien favoriete sjport is voetbal. Jaorelangk haet hae op ’t veldj gesjpeeld veur SVM Munstergelaen. Taegeweurdig voetbalt hae in de zaal bie ZVV Schtad Zitterd. Tössje 2008 en 2014 voetbalde Rob ouch nog einige jaore in de zaal veur ’t Zittesje Continue Vastgoed. Daonaeve deit hae zo’n drie keer in de waek, zowie hae ’t nuimp, ‘iezers sjmiete’ in de sjportsjool.

De aankommende Sjtadsprins Rob Goossens mit ‘zien’ CV ‘n Bietje Wiejer (foto facebook cv ‘n bietje wiejer)

Vastelaovend
Vastelaovend is Rob mit de paplaepel ingegaote. Neit zo gek messjien, went zien awwesj höbbe zich mit de Vastelaovend in Zitterd lere kènne. Same mit zien awwesj leip hae mit in de optochte en vierde zie veurnamelik Vastelaovend in de sjtad bie zaal Laumen op de Pötsjtraot, in ’t Gulickshoes in de wiek Ophaove en ouch in Munstergelaon wo hae is opgegruijt.

Rob is euvertuug dat zien veurleifde veur de pure Vastelaovend en de Zittesje leidjes is ontsjtange in zien jeug. Hae kènt dan ouch bekans alle Zittesje leidjes mitzenge, mer is nao eige zègge nog neit op ’t nivo van zien bèste vrundj Jenno. Dae wurt door Rob ouch neit veur niks de ‘Zittesje Meziekencyclopedie’ genuimp.

In ’t Vastelaovessezoen 2009-2010 is Rob same mit ein aantal vrunj alle grote Vastelaovesevenemente in Limburg gewaes, van ’t LVK pès de Gulpener Vastelaovesfinale en van de11evande11e in Mesjtreich pès de Boetezitting in Venlo, om vervolges de konklusie te trekke dat de Vastelaovend nörges zo puur is es in Zitterd.

Rob haet es zenger driemaol op ’t Kanon van ’t Balkon gesjtange es de helf van ’t Vastelaovesduo Good Dul. In dees formase won hae in 2012 ’t Munstergelaense leidjeskonkour. Rob sjreef zelf de tekste veur Good Dul en twiefelt al jaore om mit te doon aan ’t Zittesj Vastelaovesleidjes Konkour, mer dat is d’r tot noe toe nog neit van gekomme.


Femieje:

Vader Wim Goossens:

  • Gebaore op 22 Fibberwarie 1961 in Haerle en opgegruijt in Bor.
  • Net es Rob haet hae op ’t Serviam gezaete.
  • Wirk es financial controller bie Vivantes Zorggroep
  • Woonechtig in Munstergelaen es saer 1987 getrouwd mit Karin

Mooder Karin Goossens:

  • Gebaore op 14 September 1961 in Bunj
  • Woonde pés häör 17de in Zitterd, pès zie mit Wim ging samewone in Munstergelaen
  • Wirk es doktersassistente bie de hoesartse praktijk Overhoven-Hoogveld in Zitterd
  • Karin en Wim höbbe zich mit de Vastelaovend lere kènne in Kafee Schtad Zitterd.
  • Toen Rob nog neit waar gebaore, ginge zie op Vastelaovesdaensdig es maskes verkleid om Appelesiene te sjmiete in de bènnesjtad.

Brouer Niels Goossens:

  • Gebaore op 9 Augustus 1990 in Gelaen
  • Nao de aafronjing van ’t VWO op ’t Trevianum in Zitterd, sjtudeierde hae fiscaal recht in de Universiteit in Mesjtreich en is noe in deins van de euverheid.
  • Niels is groot Ajax-fan, mer bezuik ouch al jaore thoes en oetwedsjtrieje van Fortuna. Hae volgde de klup toen ze nog ongeraan sjtonge in de Eesjte divisie pès is alle oethuik van Veendam pès Almere.
  • Niels waar in 2000 jeugprins van voetbalclup VV SVM
  • Niels haet ein relase mit Aniek Pierik womit hae samewoont in Zitterd.

Brouer Stef Goossens:

  • Gebaore op 1 April 1995 in Gealen
  • Haet zien diploma VWO behaold aan ’t Trevianum en volg aan de Universiteit van Mesjtreich ein dubbele master fiscale economie, die hae onlangs haet aafgerondj, en internationaal belastingsrecht.
  • Stef is Ajacied, mer haet dit jaor ouch bekans alle thoeswedsjtrieje van Fortuna bezog.
  • Hae haet ein relase mit Annabel Dominicus.

Vrundjin Michelle Nievergeld:

  • Gebaore op 11 April 1991 in Mesjtreich en is opgegruijt in Awt-Gelaen
  • Nao ’t behaolde van häör HAVO diploma is zie gaon sjtudeiere aan de Hogere Hotelschool in Mesjtreich. Zie wirk noe es key accountmanager bie Coca-Cola.
  • Rob en Michelle höbbe zich veur ’t eesj getroffe op ’t Oktoberfees in Zitterd, mer pas versjèllende maonje later troffe zie zich weier in kafee Ich & Dich wo de vonk pas richtig euversjloug. Zie höbbe noe bekans drie jaor ein relase.
  • Saer häör relase mit Rob mis Michelle geine daag meer van de Zittesje Vastelaoves 6-daagse.

Bezunjerhede:
Rob is in ein plaatsj gebaore wo hae neit gaer mit te koup löp, namelik Gelaen. Hie is aevel waal ein oetzunjerlik gouw rae veur. Zien mooder wirkte destieds op de gynaecologie aafdeiling van ’t Ziekehoes in Zitterd en zie wou neit bie häöre baas bevalle. Mit es gevolg dat zowaal Rob es zien brouesj veur ’t eesj ’t laevesleich zouge in ‘Zitterd-Zuid’.

Rob is naeve Vastelaovesgek, ouch ein enorme fan van The Rolling Stones. Same mit ein aantal vrunj, ziene pap en sinds kort ouch Michelle bezuik hae konzers in binne en boetelandj. Hae belaefde ein sjiek moment toen hae veurigjaor op de Vrouluujzitting van de Flanelle Lepkes in de hoed moch kroepe van zien grote idool Mick Jagger.
Bie ein van de konzers  van de Stones, in 2014 in Rome, haet hae d’r same mit twee vrunj van ‘de CV’ get daag aan vasgeplek in Italië. Zie konne ’t toen neit laote om op eine sjtapaovend eine grop toeristen oet Canada ‘hoog ’t rood gael gruin’ te lere.

Es Mick Jagger op de buun op de vrouluujzitting van de Flanelle Lepkes

Rob is gek van de awwerwetse Zittesje leidjes. Vanaaf 11-11 sjteit in hoeze Goossens de Zittesje Vastelaovesmeziek aan. Op de awwerwets platesjpeler dreet hae dan veural de leidjes van vruiger.

Naeve de aw leidjes is Rob ouch fan van Mit de Trööt in de Gööt. Sjpisjaal om de nummesj van de band te promote trok hae ein aantal jaor geleë same mit ein aantal anger leje van CV ’n Bietje Wiejer nao de L1 studio om reklaam te make veur ‘De Trööt’. Volges DJ Tom Jessen zörgde de ‘CV’ same mit de angere gas Johan Vlemmix veur ein van de meis chaotische oetzendige ooit.

Same mit veier van zien beste vrunj maak Rob jaorliks ein oetsjtepke nao ’t boetelandj veur ein manneweekend, ontsjtange naodat hunne gezamelike vrunj Glenn van Haen is euverleje. Jaorliks kik hae oet nao dees oetsjtepkes, veural omdat dees besjtaon oet ’t viere van ’t laeve, ‘sjaele kal’ en ‘pötjes beier’.

Rob zien eesjte voetbalwedsjtried in ein stadion belaefde hae in De Baandert, toen hae es zösjaorige jong Fortuna mit 1-0 zoug wènne van De Graafschap. Hae is besondanks toch fan gewore van Ajax en haet väöle wedsjtreije bezoch in Amsterdam.

Same mit zien vrunj van ‘de CV’ haet hae in 2015 onger de Optoch aan kroegbaas Wil Heuts van kafee De Hollande ein sjilderie van ziene opa, awt Vors Marot Wil Heuts, cadeau gedaon, omdat Wil junior Kafee De Hollande zou gaon verlaote. Zie leipe vervolges mit ‘t  blaad beier, dat zie es dank van Wil krege, langs de Optochzjurie mer wiste desondanks toch eine pries te pakke.

Rob haet altied angs veur hunj gehad, mes saer hae Michelle haet lere kènne is hae dao langsem vanaaf gekomme. En Rob haet aan Michelle belaof  dat es hae Sjtadsprins moch waere, zie daonao eine hondj moch oetzuike.

Bron: De Marotte Zitterd
Foto’s: De Marotte Zitterd