Prinseresepse Sjtadsprins Wout I mit eine nuuje opzèt

2025
foto: Bas Smeets, Rockateer.nl

Tiejes de Plök & Vaerezitting die aafgeloupe november tiejes ’t Plök de Daag jubbeleiweekend haet plaatsjgevonje is Wout Vaasen geinsjtalleiert pès 92e Sjtadsprins van Zitterd. Tradisjoneel wurt door De Senaat van De Marotte aan de Sjtadsprins ein resepse aangebao. Normaal vèngk dees Prinseresepse altied plaatsj de daag nao de insjtallase. Doordat de insjtallase dit jaor plaatsjvonj tiejes ’t Jubileiweekend 13×11 jaor De Marotte Zitterd is de resepse verplaatsj nao eine latere datum. De Resepse van Sjtadsprins Wout I vèngk dit jaor plaatsj op zondig 19 jannewarie van 13.00 pès 17.00 oere.

Nuuje opzèt veur de Prinseresepse
De aafgeloupe jaor vonj de Prinseresepse plaatsj in ’t Forum. Dit jaor haet De Senaat van De Marotte gekaoze veur eine nuuje opzèt. De Prinseresepse krig ein mee informeel karakter en wurt verdeilt euver veier bekende kafees in de Zittesje bènnesjtad. Bènne versjèllende tiedsblokke is in dees kafees de muigelikheid is om Sjtadsprins Wout I te filleseteiere mit zien Prinssjap. De resepse zal waere aafgesjlaote mit ein muzikaal en magisch sjpektakel op de Mert.

Jeederein dae de Sjtadsprins Wout I wèlt komme fillesetiere haet de keuze oet de volgende tiedsblokke:
Blok 1: 13.00 pès 14.00 oere in Kafee ’t Sjterfhoes
Blok 2: 14.00 pès 15.00 oere in Kafee De Kup
Blok 3: 15.00 pès 16.00 oere in Café Schtad Zitterd
Blok 4: 16.00 pès 17.00 oere in De Lembourg

Foto: Bas Smeets, Rockateer.nl