Tiejes de Plök- en vaerezitting höbbe De Marotte Zitterd de heer Jan Schaekens en de heer Jan Janssen benuimp pés Ridder in de Orde van de Pappegey. Dees hoogste Zittesje Vastelaovesongersjeiding wurt jaorliks toegekend aan eine of meerdere persone die zich jaorelangk bezunjer höbbe ingezat veur de Zittesje Vastelaovend en de Marotte Zitterd in ’t bezunjer.
Jan Schaekens
De eesjte Ridder in de Orde van de Pappegey is de heer Jan Schaekens. Hae is eine richtige Vastelaovesvierder dae aafgeloupe jaor veur de 50e keer haet mitgetrokke in de Zittesje Optochte. Dit deit hae al jaore langk mit de grop ‘de Vastelaovesvrunj’. Daonaeve is Jan Schaekens ein van de inisjatiefnummesj van ’t kèrkersprojek van ’t Optoch Kommitee Zitterd. Bie dit projek boewe kènjer onger begeleiding van waageboewesj en optochdeilnummesj in de Optochhal aan kèrkes veur de Kènjeroptoch. Dit om ’t Vastelaovesvirus en ’t ‘vak’ van waageboewe euver te brènge op de jeug. Op Vastelaovesdaensdig is Jan mit de grop ‘de Vastelaovesvrunj’ aktief es appelesienesjmieter bie ’t tradisjoneel Appelesienesjmiete. In 2012 woort Jan Schaekens genomineiert es Vastelaovesvierder van Limburg, mèr greep toen naeve de tittel.
Jan Janssen
De tweede Ridder in de Orde van de Pappegey is de heer Jan Janssen. Jan Janssen ‘Jan van de Sies’ sjteit altied klaor es om hulp wurt gevraog en sjeunt hae väöle mit zien ervaring en wiesheid op Vastelaovesgebied. In 1975 regeierde Jan Janssen es Sjtadsprins Jan III euver ’t Marotteriek en waar hae van 1978 pès 1984 lid van de Wieze Raod van de Marotte. In de jaore ’80 waar Jan aktief es veurzitter van de sjtichting Gala prinsebal Zitterd en waar hae van 1993 pès 1999 veurzitter van de Auwt Prinse. In de Groote Optoch trèk Jan al jaorelangk mit bie de grop Femieje Biejeingeraap wo hae ein van kartrèkkesj is.
Foto’s: sittard-geleen.nieuws.nl
