Sjtadsvastelaovesvereiniging De Marotte Zitterd haet de heer Sjra Derrez benuimp pès Commandeur in de Orde van Pappegey. Dees benuiming vonj plaatsj aan ’t begin van de Plök en vaerezitting in de Zittesje Sjtadssjporthal.
Wie gebroekelijk woorte aan ’t begin van de zitting alle aanwezige Riddesj in de Orde van de Pappegey op de buun gebrach. Vorst Marot Joep maakte bekend dat dit jaor geine nuuje Ridder in de Orde van de Pappegey zou waere oetgroupe, mèr dat ein van de Riddesj zou waere benuimp pès Commandeur in de Orde van de Pappegey.
Dees hoge eer veil te beurt aan de heer Sjra Derrez. In 2003 is Sjra benuimp pès Ridder in de Orde van Pappegey. Veur ziene grote inzàt veur de Zittesje Vastelaovend en De Marotte in ’t bezunjer is Sjra Derrez noe gepromoveierd pès Commandeur in de Orde van de Pappegey. Sjra is eine man op de achtergrondj en sjteit daag en nach vaerdig veur de Marotte en de Sjtadsprins. Sjra is saer 1982 Bieleman en de chauffeur van de Sjtadsprins. Sjra en zörg d’r veur dat de Sjtadsprins en Vorst Marot euveral oppe tied aanwezig zeen. Wiejer is Sjra ein manusje van alles, zo bezörg Sjra onger mee euveral ’t Tillegram van de Pappegey en posters.
Eine zichbaar geëmotioneerde Sjra ontving oet hènj van de nog regeierende Vorst Marot Joep de bie zien benuiming beheurende Ridderorde en Marottepatsj. Sjra Derrez is de 12e Commandeur in de Orde van de pappegey. Veurgengesj zeen onger mee Sjuul Paques (1994) en Jeun Schelberg (1996)
Foto: Bas Smeets, Rockateer.nl
Video: Marotte TV
