Donderdig 28 november is in de Zittesje Sjtadssjporthal aan ’t Sjtadswaegske de Plök & Vaerezitting van Sjtadsvastelaovesvereiniging De Marotte Zitterd. Tiejes dees sfeervolle zitting sjteit de insjtallase van Wout Vaasen pès 92e Sjtadsprins van Zitterd centraal. De Plök & Vaerezitting is taeves de aaftrap van ’t Plök de Daag jubbeleiweekend 13×11 jaor De Marotte Zitterd.
De Plök & Vaerezitting is ein zitting die in ’t teike sjteit van komme en gaon, mèr dan in omgedreejde volgorde. In ’t eesjte gedeilte van de zitting sjteit nog eine keer de dan nog regeierende Sjtadsprins Nick II centraal. Nao ‘t ‘plökke’ brénge de Auwt Prinse Zitterd hunne tradisjonele Grosse nómmer, die bol sjteit van de aktualiteit, hilariteit, sjerpe humor en Zittesje laammaekerie.
’t Tweede deil van de zitting sjteit gans in ’t teike van de insjtallase van Wout Vaasen pès de 92e Sjtadsprins van De Marotte Zitterd. Nao de ‘aed op ’t vaenke’ krig hae door Vorst Marot Joep de bie ’t Prinssjap beheurende teikes oetgereik en zal hae offesjeel regeiere euver ’t jubbeleierende Marotteriek es Sjtadsprins Wout I. Nao de Proklemase zal Sjtadsprins Wout I zien eige Prinsemotto prizzenteiere.
De zitting wurt aafgesjlaote mit ein optraë van Beppie Kraft, die mit häör bekende leidjes de zaal vas en zeker aan ’t sjoekel;e en zènge zal kriege.
De zitting sjtart om 19.11 oere, de zaal is aope vanaaf 18.00oere. Entreekaarte veur de Plök & Vaerezitting zeen te koup via de website van De Marotte Zitterd. Kaarte koste €11,- per sjtök (excl. €1,- fee-koste).
Foto: Beeldfragment YouTube
