Vriedig 2 fibberwari haet Radio Nónnevot de veierde Zittesje Vastelaoves Top 111 oetgezonje. De finale van de TOP111 woort laif door Tom Jessen geprizzenteierd vanoet kafee ’t Sjterfhoes. In de laif oetzending woort same mit versjèllende gaste aafgeteld pès de nómmer 1. Aeve nao middernach woort de nómmer 1 van de TOP 111, edisie 2024 bekend gemaak.
Door de loesteraers van Radio Nónnevot is pès nómmer 1 in de Zittesje Vastelaoves Top111 2024 gekaoze de Marottemarsj ‘Hoog ’t Rood Gael Gruin. Dit nómmer, dat nog altied wurt gespeeld bie offesjeel marotte-momente, is de jubbeleisjlaager oet 1967 bie ‘t 4×11 jaorig jubbelei van de Marotte. Op de tweede plaatsj eindigde Cyrille Niël mit ‘’t Haw zo sjoon kènne zeen’. De driede plaatsj in de TOP111 2024 waar veur de evvergreen ‘Oukouk’ van Toon Hermans.
Hoogste nuujkommer in de TOP 111 is de Marottesjlager van dit jaor ‘Ich Aom Zitterd‘. De door Nigel & Luc gezonge sjlager sjteit op plaatsj nómmer 8.
Eerdere wènnesj van de Zittesje Vastelaoves TOP111 ware Cyrille Niël mit ‘’t Haw zo sjoon kènne zeen’ (2021) en ’t Convent van Neit Prinse mit hunne ‘Neit Prinse Repzooidie’ (2022). Aafgeloupe jaor sjtong de evvergreen ‘Oukouk’ van Toon Hermans op de eesjte plaatsj in de Top 111.
Radio Nonnevot is nog te beloestere pès Vastelaovesdaensdig middernach. Dan geit de zender weier pès de 11de van de 11de oet de loch.
Foto: Radio Nónnevot
