Donderdig veur de Vastelaovend is tradisjoneel de daag van de Auw Wiever. Dees sjlachtende maskes zeen dan pès deip in de nach in en rondj de Zittesje kafees te vènje.
‘t Convent van Neit Prinse prizzenteiert weier De Nach van ’t Auwt Wief. Zie zeen vanaaf 20.33oere mit hun mobiel podium prezént bie de sjtadspomp naeve kafee De Kup op de Lömmerichersjtraot. De Auw Wiever kènne zich op ’t podium prizzenteiere en hun sjpel sjpele. De Neit Prinse zulle alle Auw Wiever vakkundig zjureiere wobie zie kans make op ludieke prieze es ’t Sjoonste Auwt Wief, Sjoonste sjpel, Sjoonste grop, Meis Zittesj Auwt Wief en ein aantal sjpisjaal prieze. Dit alles sjteit garant veur de neudige hilariteit, ‘sjaele kal’ en Zittesje Laammaekerie. De priesoetreiking zal rondj middernach plaatsj vènje op ’t podium.
Naeve de Auw Wiever zeen op ’t podium optraës van versjèllende artiste wo onger Maud Du Chatinier, Jesse & Jesse en nog versjèrllende verrassjinge!
Auwt Wiever Konsèr
In kafee ’t Duvelke aan de Helsjtraot is ‘t tradisjoneel Auwt Wiever konsèr van De Marottekapel. Vanaaf 21.11oer pès middernach vermaak De Marottekapel de Auw Wiever en anger laammaekesj mit veural (auw) Zittesje Vastelaovesleidjes.
Foto: Convent van Neit Prinse
