De Kènjeroptoch trék weier door Zitterd

2024 Optoch

Zondig 4 fibberwari, tradisjoneel de waek veur Vastelaovend, trèk vanaaf 13.33oere de Kènjeroptoch door de sjtraote van de Zittesje bènnesjtad. De Kènjeroptoch is taeves de offesjeel intoch van Sjtadsprins Nick II. Es de waergode de Zittesje kènjer goud gezind zeen belaof ’t weier eine geweldige daag te waere, wobie väöle doezende luuj de waeg nao Marotte-sjtad Zitterd weite te vènje.

De doezende luuj langs de kantj kènne geneite van grote groppe mit soms mee es honderd deilnummesj, klein groppe van kenjer, humorvolle enkelinge en kènjer mit de kèrkes van ‘t Kèrkesprojek. De neudige hermenieje en zaate hermeniekes zörge veur de muzikaal Vastelaovesklanke.

Route
De Kènjeroptoch vertrèk om 13.33oere vanaaf ’t Maaslandpark en trèk vervolges via de volgende route: Riekswaeg Noord, Walramsjtraot, Euverhaovenersjtraot, Sjteivig, Veursjtad, Brandsjtraot, Lömmerichersjtraot, Begienehaofsjtraot, Daeke Tijssesjtraot, Kloosterplien, Auw Mert, Mert, Lömmerichtersjtraot (bie de sjtadspomp lènks aaf), Meulebaeksjtraot, Nuujsjtraot, Plaksjtraot, Pötsjtraot, Mert (ontbènjing).

Nao aafloup zal Sjtadsprins Nick II bie de tradisjonele appelesieneraege vanaaf ’t podium op de Mert doezende appelesiene oetsjmiete nao de mechelkes en sjnaake. Aansjloetend waere op ’t podium de Prieze oetgereik. Naeve de Erewimpels en Prieswimpels in de versjèllende kattegrieje zeen d’r spisjaal prieze veur ‘t ‘Sjoonst verkleide Mechelke’, de ‘Sjoonst verkleide Sjnaak’ en de ‘Gouwe paplaepel’ veur de bèste femieje.

Kènjersjurie
Naeve de optochsjurie, geit ouch weier de Kènjersjurie aan de sjlaag. Dees kènjersjurie besjteit oet sjoolgaonde kènjer en reik de wènnesj van de sjpisjaal prieze ‘Sjoonst verkleid Mechelke’ en ‘Sjoonst verkleide Sjnaak’ ein eige kènjersjurie vaenke oet.

Deilname
Jeederein kènt deilnumme aan de Kènjeroptoch. Waal verzuik ’t Optoch Kommitee Zitterd deilnummesj om zich veuraaf aan te melje. Aanmelje veur deilname aan de Kènjeroptoch kènt pès vriedig 2 fibberwari, 17.11oere via: https://www.optoch.nl/kinder-optocht/

Omdat ’t Optochkommitee ’t muigelik wèlt blieve make om sjpontaan aan de Kènjeroptoch deil te numme is insjrieve ouch nog muigelik op de zondig van de Kènjeroptoch tössje 12.30 en 13.00 oere op ’t terrein van de opsjtèlling.

Foto’s: RBZitterd-VastelaovendZitterd