Op zaoterdig 16 november e.k. is de äöpening van ’t Vastelaoveshoes oppe Lömmerichersjtraot 16 in de bènnesjtad van Zitterd. Dit pandj mit ein bezunjere historie is door Lejao Beursgens en Joep Wijnands besjikbaar gesjteld en krig noe ein nuuj laeve es de toesbasis veur de Zittesje Vastelaovend.
’t Vastelaoveshoes is ongergebrach in ein gelieknamige sjtichting mit ANBI-sjtatus (Algemeen Nut Beogende Instelling). Dat wèlt zégge dat ’t fiscaal veurdeilig is om gifte te doneiere aan ’t Vastelaoveshoes, die te goede kómme aan de Zittesje Vastelaovend.
Door ’t jaor haer fungeiert ’t Vastelaoveshoes es museum dat tiejes rondjleidinge van Visit-Zuid Limburg kènt waere bezoch. Tiejes ’t Vastelaovessezoen zal ouch de Marottewinkel geäöpend zeen in ’t Vastelaoveshoes.
Ein kleurrieke nuuj ontmoetingsplek
Mit de koms van ’t Vastelaoveshoes beije De Marotte Zitterd neit allein ein centraal gelaege museum veur Alle Vastelaovesvierders, mèr ouch ein plaatsj wo de rieke tradisies van de Zittesje Vastelaovend pès laeve kómme. Van jongk pès awt, jeederein is wilkom om de sfeer van de Zittesje Vastelaovend te komme pruive.
De Marottewinkel
Bènne ’t Vastelaoveshoes zal dus ouch de nuuje Marottewinkel ein plaatsj kriege. Hie kènne Vastelaovesleifhöbbesj alle offesjeel Marotte-merchandise vènje, van kleurrieke sjaals en mötsje pès sjpisjaal memorablia en anger unieke atribute die sjpisjaal veur de Zittesje Vastelaovend zeen ontworpe. De Marottewinkel krig ein breid assortiment wobie jeederein ’t Vastelaovesgevuil mit nao hoes kènt numme.
Offesjeel äöpening
De feestelike äöpening van ’t Vastelaoveshoes vèngk plaatsj op zaoterdig 16 november. De Marotte Zitterd neudige jeederein oet om dit bezunjer moment same te viere. Burgemeister Hans Verheijen van de gemeinte Zitterd-Gelaen zal om 11.11oere aanwezig zeen om ’t Vastelaoveshoes offesjeel te äöpene.
Bron: De Marotte Zitterd
Foto: De Marotte Zitterd
