Sjtadsvastelaovesvereiniging De Marotte Zitterd äöpend op zaoterdig 16 november ’t Jubbelei Vastelaovessezoen mit de Alaaf-trap op de Zittesje Mert. Hoogtepunt van de Alaaf Trap is de oetruiping van de 92e Sjtadsprins van Zitterd. Wae oh Wae geit ’t waere?
Veuraafgaond aan de oetruiping wurt de nuuje Sjtadsprins in eine sjtoet vanaaf de Sjtaasedwaesjsjtraot nao de Mert gebrach. Dit gebeurt mit eine teen maeter lange trailer mit dao op allein de aansjtaonde Sjtadsprins, gemaskeierd gezaete op ziene troon. De sjtoet wurt begeleid door de ‘perpluuvereiniginge’ (Marotte Zitterd, Auwt Prinse, Senaat en Optoch Kommitee Zitterd) en wurt muzikaal ongersjteund door de Philhermenie.
Veurdat de nuuje Sjtadsprins door Vorst Marot Joep I wurt oetgeroupe waere op grote led-sjerme versjèllende hints waere gaeve euver de 92e Sjtadsprins. Hiebie zal naodrukkelik de interaksie waere gezoch mit ’t pebliek.
Verkeizing Marottesjlager 2024
Tiejes de Alaaf Trap vèngk ouch de finale van de verkeizing van de Marottesjager 2025 plaatsj. In september zeen tiejes ’t Zittesje Vastelaovelsleidjes Konkoer in de Optochhal door sjurie en pebliek oet 11 ingezonje leidjes de drie finaliste gekaoze. Dees drie leidjes waere bie de Alaaf Trap laif ten geheure gebrach wonao alle aanwezige op de Mert kènne sjtömme via de app van Radio Nónnevot. De volgende 3 leidjes zeen de finaliste van de Marottesjlager 2025:
- Eine daag neit gelache; Zangk: Jan Janssen
- Plök de Daag(1); Zangk: Dette & Maurice
- Plök de Daag(2); Zangk: Cyrille Niël, Nigel Tummers & Luc Eijkenboom
Naeve de oetruiping van de 92e Sjtadsprins en de verkeizing van de Marottesjlager zulle mit Big Benny en Beppie Kraft twee artiste oet de top van de Limburgse Vastelaovesartiste optrae en d’r ein groots knallend fees van make. Ouch zulle de artiste van Vrunj van Vastelaovend versjèllende nómmesj oet hun rippertwaar ten geheure brènge.
Let op: ’t Pregram van de Alaaf-trap sjtart zaoterdig 16 november al om 18.11 oere en doert pès ongeveer 21.30oere. De prizzentase van de Alaaf Trap is dit jaor in henj van Jeroen Laven.
Bron: De Marotte Zitterd
Foto: RBZitterd/ VastelaovendZitterd
