Video: Vastelaovesoptoch 2023

2023 Optoch Video

Vastelaoveszondig 19 fibberwari trok de Groote Vastelaovesoptoch door de sjtraote van de Zittesje bènnesjtad. Nao get raege in de mörge bleef ‘t onger de optoch dreug. Ondanks de grieze loch sjitterde weier eine kleurrieke Zittesje optoch mit in totaal 88 nómmesj.

Doezende luuj, die op plaatsje rieje dik langs de route sjtonge, koosjte geneite van eine sjitterende en kleurrieke optoch mit de groote waages vol bewaeging, wo door de waageboewesj maonje aan is gewirk in de Optochhal, kolderieke groppe, köppelkes en enkelinge vol aktualiteit. De Optoch woort aafgesjlaote door de Prinsewaage mit Sjtadsprins Ruud II en de De Marotte Zitterd. Baoveop eine grote aolefant sjmeet ein sjtraolende Sjtadsprins Ruud II doezende appelsiene oet nao de luuj langs de kantj.

Ein samevatting van de Groote Vastelaovesoptoch 2023 is baoveaan dit berich te bekieke.