Op Vastelaoveszondig 19 Fibberwari trek de Groote Vastelaoves Optoch door de sjtraote van de Zittesje bènnesjtad. Drie jaor nao de letste optoch in 2019 en eine ‘noodoptoch’ in 2022 zal de Groote Vastelaovesoptoch dit jaor weier geweun door de sjtraote van de Zittesje bènnesjtad trèkke.
De doezende luuj langs de kantj kènne geneite van de veur Zitterd bekende Groote Waages, groppe, humorvolle köppelkes en einzelgänger en meziek van versjèllende hermenieje en fanfares.
De Route
De opsjtèlling van de deilnummesj en de waages vèngk plaatsj op de Leijebroukerwaeg, Pres. Kennedysingel en de Kolleberg. De Optoch zal om 13.11oere vertrèkke baovenaan de Pötsjtraot en trek dan richting de Mert. Nao de route door de Zittesje bènnesjtad, zal de ontbènjing van de optoch weier op de mert plaatsjvènje.
De optoch trèk via de volgende route:
Pötsjtraot – Mert – Auw Mert – Kloosterplien – Daeke Tijssesjtraot – Ligneplein – Willie Hillensjtraot – Riekswaeg Noord – Euverhaovenersjtraot – Walramsjtraot – Parallelwaeg – Sjtaasedwaesjsjtraot – Sjteivig – Veursjtad – Brandsjtraot – Lömmerichersjtraot – Mert / ontbènjing.
Priesoetreiking
De OptochSjurie zal alle deilnummesj en de waages beoordeile op ongerwerpe es orzjinaliteit, humor, idee, uitveuring, kleur ed. De priesreiking van de Groote Optoch zal plaatsj vènje op de Mert rondj 18.00oere. Op ’t podium waere door Sjtadsprins Ruud II de Ere Prieze en sjpisjaal Prieze es ‘Meis Zittesj Element’, Kolderpries, Sjoonste Auwt Wief en de Zitterd Trofee oetgereik.
Naeve de OptochSjurie wurt dit jaor de SjoliereSjurie geintroduceiert. Zie reike de Sjoliere Pries oet aan de in hun ouge sjoonste Vastelaoveswaage en eine 1e, 2e en 3e Sjoliere Pries aan de bèste deilnummesj.
Foto’s: RBZitterd-VastelaovendZitterd
