Vastelaovesmaondig is in Zitterd tradisjoneel de daag van de Kapelle en Zaate Hermeniekes. De kapelle laote deze middig vanaaf 14.33oere hun muzikaal klanke euver de Mert klinke. Daonaeve trèkke de kapelle door de bènnesjtad wo zie sjpele binne en boete bie de Zittesje kafees.
Aopening mit groot same sjpel
’t Tröötekonkoer sjtart om 14.33oere op de Mert mit ein uniek en groot samesjpel mit alle muzikante. Bie dit samesjpel kènt jeederein mit ein instrument mitdoon. Höb geer toes ein instrument en wèlt geer mitsjpele bie dit samesjpel? Kom dan Vastelaovesmaondig om 14.33oere nao de Mert en sjpeel mit. De pertie is te downloade via de website van De Marotte Zitterd. Sjtadsprins Ruud II zal de grootste Zaate Hermenie van Zitterd dirigeiere.
Nao de äöpening zulle de Zittesje kapelle en Zaate Hermeniekes aafwisselend sjepele op ’t podium op de Mert. De volgende kapelle zulle mit hun muzikaal klanke de Vastelaovesvierders vermake: Herriemenie Miserabel, de Marottekapel, Kapel Nootsj Biejein, Aafsjlaag Zitterd, TisNiksenTwurtNiks, De Sjwaegelebend, Hou op die Kis en de Prinselikke Sjtadskapel ’t Trumke en ’t Tröötje. Naeve de muzikaal klanke van de kapelle zal Cyrille Niël versjèllende Zittesje Vastelaovesleidjes brènge.
’t Tröötekonkoer wurt mit ein konsaer vol sjpektakel aafgesjlaote door Trööt in de Gööt. In November haet Trööt in de Gööt bekend gemaak dat zie nao 45jaor gaon sjtoppe mit optraë. Op ‘t Tröötekonkoer zulle zie veur de allerletste keer oppe buun sjtaon en nog eine letste keer hun bekende nómmesj sjpele.
Bron: De Marotte Zitterd
Foto: RBZitterd-VastelaovendZitterd
Illustratie: De Marotte Zitterd
