De Vastelaovend sjitterde dit jaor weier awwerwets in Zitterd. Eine sjtraolende en muzikale Sjtadsprins Ruud II ging dit sezoen veurop same mit De Marotte Zitterd mit hunne nuuje Vorst Marot Joep Wijnands.
Ein sezoen dat begoosj op mit de de Alaaf-trap op 12 November wobie Ruud Rousseau woort oetgeroupe pès 90e Sjtadsprins van Zitterd. In ’t nuuje jaor ging ’t sezoen wiejer mit de Plök en vaere zitting, de Prinseresepse en de insjtallase van Joep Wijnands pès nuuje Vorst Marot. Nao de tradisjonele seniorezitting ging ’t richting de Vastelaovesdaag. De zondig veur de Vastelaovend koosj nao veier jaor entjelings weier de Kènjeroptoch weier door de Zittesje sjtraote trèkke.
De Zittesje Vastelaoves 6-daagse begoosj tradisjoneel op de donderdig veur de Vastelaovend mit de Nach van ’t Auwt Wief gevolg door sjoliere Vastelaovend op vriedig. Op zaoterdig sjtong de Mert weier vol mit 11 doezend luuj bie ’t Kanon van ’t Balkon mit optraës van väöle Limburge topartiste. Op Vastelaoveszondig trok eine kleurrieke Vastelaovesoptoch door de sjtraote van de Zittesje bènnesjtad. Vastelaovesmaondig waar weier de daag van de Zittesje kapelle en zaatehermeniekes mit ’t Tröötekonkoer, wobie de muzikale Sjtadsprins Ruud II op zien trööt mitsjpeelde bie versjèllende kapelle. ’t Tröötekonkoer woort aafgesjlaote mit ’t allerletste optrae van Trööt in de Gööt. Vastelaovesdaensig is de daag veur de kènjer. ’t Tradisjoneel appelsienesjmiete woort in ein nuut jeske gesjtaoke en gecombineiert mit Kènjer Carnivale mit zènge, danse en sjprènge. Mit ’t aafhaole van ’t Maske kwaam weier ein enj aan de Zittesje Vastelaovend en is ’t wachte pès de 11de van de 11de es ’t nuut sezoen weier geit beginne.
Mit de Vastelaovend veier waeke achter de rögk is ’t noe hawfvaste, ein sjoon moment om nog èns trök kieke op de aafgeloupe Vastelaovend. Hie onger nog èns de beelde van aafgeloupe sezoen.
Foto’s: RBZitterd-VastelaovendZitterd
Video’s: RBZitterd-VastelaovendZitterd en Marotte TV
