Tiejes de Alaaf-trap van ’t sezoen is Nick Smeets oetgeroupe pès 91e Sjtadsprins van Zitterd. Ziene Hoogheid zal regeiere euver ’t Marooteriek es Sjtadsprins Nick II.
De aankomende Hoogheid woort in eine sjtoet, gemaskerd gezaete op zien troon, vanaaf de sjtaase nao de Mert gebrach. Veur de oetruiping woort de sjpanning nog hoger gemaak mit de finale van ’t Zittesj vastelaovesleidjes Konkoer en ein optrae van Pruuf Mar. Aeve nao 21.00oere Vorst Marot Joep I ’t Tillegram van de pappegey’ vergelaeze en kwaam Nick Smeets onger ’t Maske oet.
Nick is 31 jaor, gebaore in Broukzittert en woont same mit zien maedje Ellen. In ’t dagelikslaeve is Nick Electro-technicus bie U.S.G. op Chemelot. Nick is zeker geine onbekende in de Zittesje Vastelaoveslaeve. Zo is hae waageboewer bie Klup de Sjnaake en boewt hae mit aan de dekors veur de Zittesje Revuu. Ouch boewt Nick mit aan de waages veur ’t Oktoberfees wo hae vast ‘Wage-èngel is bie de waage van Miss Oktoberfeest.
Nick is de zoon van Sjohn Smeets en Linda Talman. Zie höbbe häöm op jonge laeftied betrokke in ’t vereinigingslaeve en de tradieses van de Zittesje Vastelaovend mit de paplaepel mitgegaeve. De pap Sjohn Smeets,bekend es leidjessjreiver en lid van De Sjnaake, woort min 2001 benuimp pès Ridder in de Orde van de pappegey veur zien tomeloze inzat veur de Zittesje Vastelaovend. De mam Linda Talman leerde Nick zien eige Vastelaovespèkskes te ontwerpe en make.
De insjallase van de aankommende Hoogheid zal plaatsjvènje tiejes de Plök en Vaere-zitting op zaoterdig 6 jannewari 2024 in ’t Forum.
Foto: RBZitterd-VastelaovendZitterd
Tillegram: De Marotte Zitterd
