Radio Nónnevot Podcasts

2023 Meziek
De iniatiefnummesj van Radio Nónnevot Marc Webers (links) en Ruud Meuwissen (rechts)

Op de 11de van de 11de is Radio Nónnevot weier gesjart mit oetzénde. Pès essjelegoundig kènt 24 oere pér daag waere geloesterd nao Zittesje Vastelaovesmeziek van vruiger en noe en de bèste Limburgse Vastelaoveshits.

Loestere nao Radio Nónnevot kènt via de website van Radio Nónnevot en op de mobiele tillefoon via de nuuje Radio-Nónnevot app (IOS en Adroid). In de nuuje radio Nónnevot app vèngk geer ouch ’t letste Zittesje vastelaovesnuuts, Podcasts en kènt geer bènnekort sjtömme veur de Zittesje TOP111.

Radio Nónnevot Podcast
Dit sezoen geit Radio Nónnevot weier versjèllende waekelikse Podcasts oetzende. Nuuj is de waekelikse colomn ‘Kaek van de Waek’ door Peet van Erp. Mit zien ervaring in de Zittesje Vastelaovend geef hae ein sjerpe blik op ’t Vastelaovesnuuts oet ’t Marotteriek. ‘Kaek van de waek’ is te beloestere op maondigaovend om 19.00oere.

Jeedere daensdig om 19.00oere prizzenteiert Ton Meisen de podcast Tonnie’s Viniellie Tip. Mit richtige sjlaagesj op vinyl of mit eine artis wo me nog nootsj van geheurd haet en aaf en toe geweun neit om aan te heure…. Mer altied mit eine knipoug en mit de richtige Vastelaovessjpas.

De waek wurt op vriedigaovend om 21.00oere aafgesjlaote door DJacky mit de Mega Maffe vastelaovesmix. Eine bóntje krallekètting van de meis favoriete nómmesj sjesjaal door DJacky gesillekteiert veur uch.

Alle podcasts zeen trök te loestere in de Radio Nónnevot app, via Spotify en Soundcloud.

Foto’s: Radio Nónnevot