Oukouk nómmer 1 in de Zittesje Top 111

2023 Meziek

Zaoterdig 11 fibberwari haet Radio Nónnevot veur ’t derde jaor op riej de Zittesje Vastelaoves Top 111 oetgezonje. De finale van de TOP111 woort door Tom Jessen geprizzenteierd laif vanoet kafee ’t Sjterfhoes. Naeve de bèste 3×11 leidjes en ’t bèkend make van de nómmer 1 kwame in dees laif oetzending versjèllende gaste, wo onger Sjtadsprins Ruud I en Vorst Marot Joep I veurbie.

Door de loesteraers van Radio Nónnevot is pès nómmer 1 in de Zittesje Vastelaoves Top111 2023 gekaoze ‘t leidje ‘Oukouk’. Deze klassieker oet 1955 is gesjreve door Toon Hermans. Daomit is veur ’t driede jaor op riej ein anger leidje pès nómmer 1 verkaoze.

Bie de eesjte TOP111 in 2021 sjtong Cyrille Niël op nómmer 1 mit ‘t veur toen toepasselikke ‘’t Haw zo sjoon kènne zeen’. Veurigjaor sjtong ’t Convent van Neit Prinse op nómmer 1 mit hunne ‘Neit Prinse Repzooidie’.

Radio Nonnevot is te beloestere pès Vastelaovesdaensdig middernach. Dan geit de zender weier oet de loch pès de 11de van de 11de.

Foto: Radio Nonnevot