De Marotte Zitterd brenge dit jaor weier ein nuuj CD oet mit de Vastelaovessjlagesj van dit sezoen. De leidjes zeen opgenomme bie de Zittesje Studio Veier. De hoes van de CD is ontworpe door Marc Webers van studio MarQ.
Op de CD sjteit de top 3 van ’t Zittesje Vastelaovesleidjes Konkoer mit es eesjte de door Nigel en Luc gezonge Marottesjlager ‘Ich Aom Zitterd’. De door Theo Wezenberg gesjreve Marottesjlaager is op de 11de van de 11de door ’t Volk van Zitterd gekaoze. Naeve de sjlaager sjtaon mit ‘Ich ken d’r neit genog van kriege’ gezonge door Cyrille Niël en ’t door Koeraasj gezonge ‘Veer wille niks misse’ de nómmesj twee en drie van ’t Zittesj Vastelaovesleidjes Konkoer op de CD.
Naeve de top 3 van ’t ZVK zeen nog drie anger leidjes van ’t Zittesj Vastelaovesleidjes Konkoer op de CD te beloestere. Daobiej De Dörpelmaeg (Prieswènnesj beste nuujkommer ZVK) mit ’t leidje ‘Dao komme de Dörpelmaeg’ en de door Fieny Cals gezonge ballade ‘Mien Zitterd’. ’t Letste nómmer op de CD is de grop Angesj dan Angesj mit ’t leidje ‘Nog eine mit de jas aan’.
De CD ‘Ich Aom Zitterd’ is allein te koup in de Marottewinkel welke te vènje is in de kelder van Gijsen Horen & Zien op ’t Tempelplien. In de Marottewinkel zeen ouch nog ein aantal CD’s oet veurgaonde jaore verkriegbaar.
Naeve de nuuje CD zeen de nuuj Vastelaovessjlagesj ouch te beloestere via de bekende Streamingsdeinste.
Aafbeelding: CD hoes, ontwerp Marc Webers
