Vastelaovesdaendig vonj weier ’t tradisjoneel appelsienesjmiete plaatsj. Dit jaor woort ’t appelsienesjmiete veur de eesjte keer gecombineiert mit ’t De Marotte Zitterd georganezeierde Kènjer Carnivale, ein Vastelaovesevemenent sjpisjaal gerich op de kènjer.
Tiejes ’t pregram van Kènjer Carnival ware optraes van onger mee Big Benny, Lisa & Max, Cyrille Niël en versjèllende Zittesje danssjoole. De groppe appelsienesjmietesj sjmete gezamelik de appelsiene oet vanaaf ’t grote podium op de Mert en trokke dao nao euver de mert en door de bènnesjtad op de tradisjonel appelsiene te ‘sjmiete’ nao de väöle aanwezige mechelkes en sjnaake.
Naeve de Marotte mit Sjtadsprins Ruud II en Vorst Marot Joep ware CV de Koelkop oet Sanderbout mit Jeugdprinses Fleur I en de appelsienesjmietesj van CV de Kempernaaze mit Jeugdprinses Brechtje I aanwezig op deze letste daag van de Vastelaovend.
Mit eine goud gevölde Mert, eine top Vastelaovessfeer en väöle mechelkes en sjnaake mit auwwesj en opa’s en oma’s kènt trök waere gekeke op ein gesjlaagde eesjte edisie van Kènjer Carnivale. Ouch Vastelaovesdaensdig sjitterde de Vastelaovend weier in Zitterd.
Foto’s: RBZitterd-VastelaovendZitterd
