Sjtadsvastelaovesvereiniging De Marotte Zitterd organizeiert op zaoterdig 11 november de tweede edisie van de Alaaf-trap. Ein evenement wobie gans Zitterd in sjpanning is wae es 91e Sjtadsprins van Zitterd wurt oetgeroupe.
Veuraafgaond aan de oetruiping wurt de nuuje Sjtadsprins in eine sjtoet vanaaf de Sjtaasedwaesjsjtraot nao de Mert gebrach. Dit gebeurt mit eine teen maeter lange trailer mit dao op allein de aansjtaonde Sjtadsprins, gemaskerd op ziene troon. De sjtoet wurt begeleid door de ‘perpluuvereiniginge’ (Marotte Zitterd, Auwt Prinse, Senaat en Optoch Kommitee Zitterd) en wurt muzikaal ongersjteund door Hermenie Sint Joep.
Es de sjtoet is aangekomme op de Mert zal naodrukkelik interactie waere gezoch mit de bezuikesj op de Mert. Dit gebeurt middels veier grote led-sjerme en eine enthousismeierende sjpraeksjtalmeister. Daonaeve zulle de led-sjerme gebroek waere om hints te gaeve euver de 91e Sjtadsprins.
Verkeizing Marottesjlaager 2024
Nao de oetruiping van de nuuje Sjtadsprins blif ’t sjpannend, wènt dan wurt bekend welk leidje pès Marottesjager 2024 wurt verkaoze. De verkeizing van de Marottesjlaager 2024 lègk gans in henj van ’t volk van Zitterd. De drie finaliste waere laif ten geheure gebrach wonao jeederein kènt sjtömme via de app van Radio Nónnevot.
Op 23 september zeen tiejes ‘t Zittesj Vastelaovesleidjes Konkoer de volgende 3 finaliste gekaoze:
- ICH AOM ZITTERD; Zangk: Nigel Tummers & Luc Eijkenboom
- ICH KÈN D’R NEIT GENÓG VAN KRIEGE!; Zangk: Cyrille Niël
- VEER WILLE NIKS MISSE; Zangk: Koeraasj
De Alaaf-trap is ein evenement veur alle Vastelaovesvierders van Zitterd. Zo zulle versjèllende topartiste optraë mit daobie de wènnesj van ’t LVK van de aafgeloupe drie jaor: Pruuf Mar (wènnesj LVK 2023), Björn en Mieke (wènnesj LVK 2022) en Hondervel (wènnesj LVK 2019 en 2021).
’t Pregram van de Alaaf-trap sjtart zaoterdig 11 november om 19.30oere en duurt pès ongeveer 22.00oere.
Bron: De Marotte Zitterd
Foto: RBZitterd/ VastelaovendZitterd
