Sjtadsvastelaovesvereiniging De Marotte Zitterd en de Zonnebloem organezeiere same de tradisjonele seniorezitting. De twellefde edisie van de Zittesje Seniorezitting vèngk plaatsj op gounsdigmiddig 1 Fibberewari.
De seniorezitting sjteit garant veur eine gezellige middig vol zangk, humor, sjoekele en lache in de grote zaal van ’t Toon Hermans Theater. Bie bènnekoms waere de bezuikesj perseunlik wilkom geheite door Sjtadsprins Ruud II, Vorst Marot Joep I en de aafdeilingsveurzitter van de Zonnebloem, Jack Vahsen.
De zitting wurt geäöpend door Basissjool Aan de Meule mit ’t Marottekènjerleidje ‘Veuroet, Veuroet, Noa Veure’. Wiejer sjtaon op ’t pregram optraës van meervoudig Limburgs Buutekampioen Fer Naus, Paul-Jean Jessen, Cyrille Niël, de dansmariekes van de Sjoutvotte en es klap op de vuurpiel nemes minder es de Limburgse Nachtehaal Beppie Kraft. Wie gebroekelik wurt de muzikaal omliesting verzörg door de Marottekapel. De prizzentase van de zitting is in henj van Nicole Schurgers en Hilde Coumans.
’t Pregram van de zitting sjtart om 14.11oere en doert pès ongeveer 17.15oere. Kaarte koste €15,- per persoon, inklesief ein drénkske onger de pauze, ein nonnevot en gebroek van de garderobe. Kaarte zeen verkriegbaar in de Marottewinkel (bie Gijsen Zien & Horen), via e-mail: seniorenzitting@gmail.com of bie ’t Toon Hermans Theater.
Bron: De Marotte Zitterd
Foto: Arjan Krijntjes / De Zonnebloem
