Zittesje leidjes in de finale van LVK 2022

2022 Meziek
Kwebbel & Sjnebbel

In ein sjpannende oetzending op L1 Radio zeen gisteraovend de 20 finaliste van ’t LVK 2022 bekend gemaak. Bie de 20 finaliste zitte twee leidjes oetkòmmend veur Zitterd.

De eesjte Zittesje finalis is ’t duo Jesse & Jesse mit ‘Maske Verplich’. De teks en meziek van ‘Maske Verplich’ zeen gesjreve door Thei Wessels en Paul-Jean Jessen. Saer 2019 vorme nonk Paul-Jean Jessen en naef Tristan Jessen ’t duo Jesse & Jesse. Zie sjtaon dit jaor veur de driede keer in de finale, wo zie zulle optraë es nómmer 02.

Es nómmer 11 in de finale sjtaon de dames Kwebbel & Sjnebbel’ mit ‘Veer zeen nog lang neit euver de datum haer’. De dames Kwebbel & Sjnebbel, alias Cyrille Niël en Sjef Schurgers, höbbe dit jaor veur ’t eesj ein Vastelaovesleidje opgenomme. De teks en meziek zeen gesjreve door Guus Steinen. In de finale zulle de dames Limburg laote zeen dat zie nog lang neit euver de datum zeen!

Jesse & Jesse

Sjtömme:
Sjteun de Zittesje leidjes op waeg nao de LVK winst door te sjtömme.
Jesse & Jesse: SMS LVK (spatie) 02 nao 4004
Kwebbel & Sjnebbel: SMS LVK (spatie) 11 nao 4004

’t Tiedsjtip dat gesjtömp kènt waere wurt in de oetzending bekend gemaak.
Per tillefoonnómmer maag max 3 keer waere gesjtömp op 3 versjèllende leidjes.

De finale van ’t LVK is op vriedig 18 Fibberwarie in de sjouwburg in Venray. De finale is vanaaf 19.00oere laif te volge op L1 TV en L1 Radio. Mee infermase euver ’t LVK en alle 20 finaliste zeen te vènje op de websait van de Stichting LVK.

Foto: Beeldfragment Vimeo