Zittesj Vastelaovesleidjes Konkoer 2022

2023 Meziek

Nao ein noodgedwonge aafwezigheid van twee jaor organezeiert Sjtadsvastelaovesvereiniging De Marotte Zitterd op zaoterdig 27 augustus weier ‘t Zittesj Vastelaovesleidjes Konkoer. Wie gebroekelik vèngk ‘t ZVK plaatsj tiejes ’t Sint Rosa Festival op de sjootsveljer in Sjpeigeltent Majestic. Tiejes deze finale aovend wurt de Marotte sjlaager 2023 gekaoze.

De 11 leidjes die in de finale sjtaon waere beoordeild door ein vaksjurie, vastelaovessjurie en de pebliekssjurie. Nao ein pauze, es de sjtömme waere geteld, wurt de oetsjlaag bekend gemaak. ’t Wènnende leidje wurt oetgeroupe pès de Marottesjlaager 2023. Aan de sjriever/Komponis van ’t wènnende leidje wurt de Thei Hunnekens Wisseltrofee oetgereik.

De wènnende sjlaager wurt same mit de nömmesj twee en drie en ein kenjer- en tienerleidje opgenomme in ein profesjonele studio. Vanaaf november zeen de leidjes te beloestere via de bekende streamingsdeinste.

De 11 finaliste in volgorde van optraë:

  1. Zèng mit mich…; teks en meziek: Thei Wessels
  2. Oma; teks en meziek: Reinhard Wind
  3. Hiej neit weg te sjlaon; teks en meziek: Thierry Dirkx
  4. Vraem Veugel; teks en muziek: Rob Hodzelmans
  5. Os hart sileit veur Zitterd!; teks: Theo Weijman, meziek: Mark Willems
  6. Zitterd same is magnefiek; teks: Chris Luiiten, meziek: Huub Lemmens
  7. Sjalevaeger veur ’t laeve; teks:Theo Weijman, meziek: Mark Willems
  8. Pekske klaor?; teks en meziek: Guus Steinen
  9. De vastelaoves-rock ’n roll; teks en meziek: Phil Schaeken
  10. Veer feeste hie – Veer feeste dao; teks: Mathieu Reintjens, meziek: Wim Roeffen
  11. Wo brènt noch leich?; teks: Sjohn Smeets, meziek: Gian Prince

Veuraafgaond aan de wedsjreid is ein korte trökblik op ‘t aafgeloupe sezoen mit ’t zènge van de Marottesjlaager 2022: ‘De Zittesje Geis’. Doordat aafgeloupe sezoen gein Zittesj Vastelaovesleidjes Konkoer koosj plaatsjvènje höbbe De Marotte Zitterd Sjohn Smeets, Thei Wesseld en Guus Steinen gevraog om gezamelik eine sjlaager te sjrieve. De sjlaager van 2022 woort gezonge door versjèllende Zittesje zèngesj.

Bron: De Marotte Zitterd
Foto: RBZitterd – Vastelaovend in Zitterd / Marotte Zitterd