Wae sjrif de Marottesjlaager 2023?

2023 Meziek
In 2019 wonne sjriever Phil Schaeken (rechts) en zènger René Dirkx (links) de Marottesjlaager

Drie jaor nao de letste edisie (énj Augustus 2019) organezeiert Sjtadsvastelaovesvereiniging De Marotte Zitterd dit jaor weier ’t Zittesj Vastelaovesleidjes Konkoer (ZVK). Tiejes deze aovend zal de Marottesjlaager 2023 waere gekaoze.

Deilnummesj kenne hun leidjes veur ’t ZVK insjikke pès 15 Mei e.k. Es mee dan ellef leidjes waere ingesjik zal ein veurseleksie plaatsjvènje. In de finale van ’t ZVK zulle ellef finaliste hunne opwachting make in de sjtried om de Thei Hunnekens wisseltrofee.

Veurwaarde van deilname:

  • De meziek teks en meziek motte orzjineel zeen, maoge neit eerder in ‘t aopenbaar ten geheure zeen gebrach en deine gemaak te zeen mit de intensie om deil te numme aan aan ’t konkoer veur de verkeizing Marottesjlaager 2023. Aevel, veur dit jaor wurt ein oetzonjering gemaak: Leidjes die al ware ingesjik veur ’t door Corona aafgelasjde konkoer 2021 maoge opnuuj deilnumme;
  • De teks mot in ’t Zittesj-plat gesjreve en/of gezonge zeen;
  • De meziek deint in noote-sjrif genoteiert te zeen en de teks deint onger de melodielien waere gesjreve. Aanlevere bie veurkeur es Sibelius of midi-besjtandj;
  • De teks deint taeves apaart es Word-besjtand aangelevert te waere;
  • Ouch deint vermeld te waere welke artis ’t leidje geit zènge;
  • Nuuj dit jaor is de muigelikheid om zellef ein arranzjement en/of begeildingbandj aan te levere;
  • Alle documenten gaer veurzeen van naam, adres, tillefoonnommer en e-mail adres(se) van tekssjrievesj en/of komponiste;
  • ’t Is per sjriever / komponis toegesjtaon om meerdere leidjes in te sjikke, ouch in combinase mit versjellende sjrieversj/komponiste;
  • Bie deilname behawte de Marotte Zitterd ‘t alleinrech om leidjes op geluidsdrager of streamingsdeinste te publiceiere en oet te brènge;
  • De inzending deint vergezeld te zeen van eine korte oetlègk euver ’t nommer om de sjurie ein baeter inzich en gevuil te gaeve bie ’t leidje. Inzende kènt pès 15 Mei e.k. via mail nao secretaris@marotte.nl.
  • Es deilnumesj neit in de muigelikheid zeen om aan baovesjtaonde veurwaarde te voldoon of es hulp neudig is bie ’t oetwirke van de muzikaal krease of idee, kent kontak waere opgenomme mit de meziekkemisse via secretaris@marotte.nl. De kemisselede zeen de deilnummesj gaer van deins en helpe mit alle plezeier.

Finale
De veier wènnede leidjes waere door De Marotte Zitterd veurzeen van ein profesjoneel studio-opname. Taeves waere de nommesj via streamingsdeinste oetgebrach en baoven-al maoge de wènnesj van de Marottesjlaager 2023 de Thei Hunnekens wisseltroffe in ontvangs numme.

’t Zittesj Vastelaovesleidjes Konkoer zal rondj ’t enj van de zomervekans plaatsjvènje. De exacte daum en tiedsjtip van de finale waere op ein later moment bekendgemaak.

Bron: De Marotte Zitterd
Foto: RBZitterd