Vastelaovesmaondig is tradisjoneel de daag van de Zittesje kapelle en zaate Hermeniekes. In taegesjtèlling tot d’n Optoch, wurt ‘t Tröötekonkoer dit jaor neit georganiseierd. Toch zulle Vastelaovesmaondig de klanke van de Zittesje kapelle door de sjtad klinke.
Onger ’t motto ‘Trööte in de sjtad’ zulle de kapelle vanaaf 14.00oere door de sjtraote trèkke mit eine róndjgank langs de kaffeekes, zodat toch awwerwèts genaote kènt waere van alle kapellemeziek! Bie de versjèllende kaffees zulle de kapelle binne en boete gaon Trööte. Meziek heurt bie Vastelaovend en de kapelle zeen ein belangriek elemènt van dae sjone eeuwenawwe Zittesje vastelaovend.
