De Zittesje ‘band mit ein hoog kapel gehalte’ Trööt in de Gööt haet in gezamelik euverlegk besjlaote om te sjtoppe mit optrae. Nao 45jaor, ein paar honderd optraës, veier CD’s, mèr veural väöl plezeier is ’t noe goud gewaes. Op Vastelaovesmaondig 20 Fibberwari zal Trööt in de Gööt tiejes ’t Tröötekonkoer op de Zittesje Mert ’t letste optrae gaeve.
(Mit de) Trööt in de Gööt is in 1977 ontsjtaon oet ein muzikale vrunjegrop, wovan de meiste toen ongeveer 16 jaor ware. De eesjte jaore waar ’t nog ein zaate hermenieke dat veural mit de vastelaovend optraës verzörgde en nao verloup van tied mee optraës boete de Vastelaovestied kreeg. Van ‘t ‘klassieke’ Vastelaovesrippertoire ging ’t mee richting disco, rock en popmeziek die sjpisjaal veur Trööt in de Gööt woort gearranzjeierd. Daodoor woort de ‘zaate hermenie’ sjteeds mee ein ‘band’ en kwame gitare en ’t keyboard d’r bie. De optraës woorte ouch ummer groter en krege ein thema, zo es begin jaore ’80 de befaame ‘Weltreis’ optraës mit eige dekór, vuurwerk en de dames van de muzikante es showballet op de buun. Sjef Schurgers kreeg mee de rol van veurman mit complete goochel-acts, de optraës aan ein kalle en mènnig nómmer van Limburgse tekste veurzeen en zènge. ’t Waar Piet Boonstra van Duo Oetgesjlaope dae Trööt in de Gööt de tip gouf om es ‘act’ mit ein optrae van 30-40 menuut de tent oppe kop te zètte. In ’t Vastelaovessezoen ware in dae tied meistal 35-40 optraës door gans Limburgs, mèr ouch in Belsj en Dutshjlandj. Twee of drie optraës op eine aovend en acht in ein weekend ware toen gein oetzonjering.
In 2004 woort besjlaote om al eine sjtap trök te doon; Gein optraës mee boete ’t Vastelaovessezoen en nog mèr ein paar optraës per jaor. De waar de gouwe balans om nog ummer mit heel väöl plezeier op te trae. Noe zeen de lede van ’t eesjte oer ongertösje baove de 60 en live-acts op zittinge en grote evemènte waere zeldzamer. Veur Trööt in de Gööt ’t momént om te sjtoppe. Es vrunjegrop blif Trööt in de Gööt besjtaon, met de Trööt blif ‘in de Gööt’.
Trööt in de Gööt zal nog drie maol optraë in Zitterd; Op de Vrouwluujzitting van de Flanelle Lepkes, ’t Kanon van ’t Balkon en tot sjlot ’t allerlétste optrae op Vastelaovesmaondig tiejes ’t Tröötekonkoer op de Mert.
Bron: Trööt in de Gööt
Foto: RBZitterd / VastelaovendZitterd
