Route Vastelaovesoptoch 2022

2022 Optoch

Nao ruum 1000 daag zonger optoch zal op zondig 27 Fibberwarie 2022 weier eine Vastelaoves door de Zittesje sjtraote trèkke. Kompleet onverwach! Begin Fibberwarie, toen alle corona-seinen op rood sjtonge, zoug ’t dao totaal nog neit nao oet. De (onverwachte) euverheidsmededeiling op 15 fibberwarie dat alles weier op gruin zou komme te sjtaon waar veur ’t Optoch Kommitee Zitterd rae om direk te gaon bekieke of esnog eine Optoch zou kènne trèkke. Vanaaf dat moment ware veur ’t Optoch Kommitee Zitterd nog nauweliks 10 daag veurbereidingstied, wo normaal al op 11 november mit wurt gesjtart. In de praktijk beteikende dat veur väöl zake geine tied waar om oetgebreid te besjpraeke, mèr dat väöl zake heel sjnel moosjte waere besjlis.

’t Optoch Kommitee Zitterd kreeg vanoet de gemeinte de toezegging dat zie de opotch zouwe wille faciliteiere. Gezeen ’t korte tiedsbesjtek van veurbereiding zal de optoch euver de sjtraote rondjom ’t centrum trèkke. Eine optoch door ’t centrum (Sjteivig, Veursjtad, Brandjsjtraot, Lömmerichtersjtraot) zou muigelik zörge veur grote aantalle bezuikesj in de sjmaal winkelsjtraote en daomit muigelik ein risico vorme op ein hoge besmettingskans mit ‘t coronavirus. Daonaeve hange teentalle lampe te leeg veur de groote Vastelaoveswaages, zou op plaatsje sjtraotmeubilair motte waere gedemonteierd en buim waere gesjnoeid. Dees optelsom waar veur de gemeinte rae te besjloete dat de optoch neit door de bènnesjtad kènt trèkke.

De optoch zal trèkke via de volgende route:
Opsjtèlling op de Wilhelminasjtraot vanaaf ’t kruuspunt Riekswaeg Zuid.
De optoch vertrèk om 14.00 oere en zal trèkke euver de Engelekampsjtraot (14.10 oere), Leijebroukerwaeg (14.15 oere), Pres. Kennedysingel (14.30 oere), Odasingel (14.50 oere), Haspelsesjtraot (15.00 oere), Daeke Tijssesjtraot, Kloosterplien (15.10 oere), Auw Mert en de Mert (15.20 oere). Op de Rosmeulesjtraot zal de optoch waere ontbonje.

Bron: Persbericht Optoch Kommitee Zitterd
Foto: RBZitterd / Optoch Kommitee Zitterd (route)