Zaoterdig 7 Jannewari is in ’t Forum (Engelekampsjtraot) de Plök en Vaerezitting van Sjtadsvastelaovesvereiniging De Marotte Zitterd. Ein zitting mit protokol, vaere, kolder en väöl meziek. De zitting begint om 19.30oere, de deure van ’t Forum Aöpene om 18.30oere.
Centraal dees zitting sjteit de insjtallase van Ruud Rousseau pès 90e Sjtadsprins van Zitterd. Volges protokol wurt hae nao de ‘aed aan ’t vaenke’, ’t oetreike van de bie ’t prinssjap beheurende teikes en ’t veurlaeze van zien proklemase offesjeel geinsjtalleiert pès Sjtadsprins Ruud II. Ein tweede offesjeel momènt is de bekendmaking van de nuuje Ridder in de orde van de Pappegey.
Grosse Nómmer
Veur Zittesje laammaekerie van de bäövesjte plank sjtaon de Auwt Prinse garant mit hun Grosse Nómmer. Normaal numme de Auwt Prinse tiejes de Grosse Nómmer de pas geplökte ex-Sjtadsprins op bènne hun vereiniging. Aevel aafgeloupe sezoen waar ein sezoen zonger Sjtadsprins waar, wodoor de Auwt Prinse dit jaor gein nuut lid bènne hun vereiniging kènne opnumme. Toch brènge zie dit jaor weier de Grosse Nómmer oppe buun.
Vastelaoves konsaer
Naeve de offesjeel momente en de Grosse Nómmer sjteit ein heus Vastelaoves konsaer op ’t pregram. Paul-Jean Jessen, Cyrille Niël en Jan van Daal brènge tiejs dit Vastelaoves konsaer, in ein uniek samesjpel mit de 23 top muzikante van Big Band Time Out, klassieke Zittesje vastelaovesleidjes in ein nuut jeske. Vervolges is ’t tied om de zènge en sjoekele mit de nachtegaal van Limburg… Beppie Kraft! Es aafsjloeter zal Big Band Time Out bekènde vastelaovesleidjes oet Limburg brènge mit hun eige zengesj en zangeresse.
Kaartverkoup
Kaarte veur de Plök en Vaerezitting zeen vriedig 16 december e.k. vanaaf 11.00oere te koup via de website van ’t Forum. Kaarte koste €15,- per sjtök. (incl. gratis garderobe).
Kaarte besjtèlle kènt via Webshop Forum Sittard
Bron: De Marotte Zitterd
Foto: RBZitterd – VastelaovendZitterd
