Maske Begrave

2022

Tradisjoneel wurt op Vastelaovend op daensdigaovend aafgesjlaote mit ‘t Maske begrave. Dees sirremonie, es teike dat de Vastelaovend veurbiej is, wurt dit jaor veur de 47e keer georganezeiert door de Mander en Zitterd Same.

Mit ein korte plechtigheid zal eesj om 21.11oere ’t Maske, dat sinds 11 november aan ’t balkon van De Kroon oppe Mert hingk, waere aafgehaold. Aansjloetend wurt in eine fakkeltoch nao ’t Kloosterplien getrokke. Dao zal, nao ein carnavaleske en hartversjeurende toesjpraok, de rood, gael, gruin Vastelaovesvaan waere gesjtreeke en wurt ’t maske onger tromgeroffel en massaal geböök begrave. Nao de 11 saluutsjäöt volg ’t zjwaorste deil van de sirremonie: de menuut sjtilte. Tot blaoze trompetiste ein letste sirrenade en klink oet honderde sjorre kaele nog eine keer  ‘Zitterd Allein’. Nao aafloup in bie Tapperie de Gats ein kaffetaofel.