In normaal tieje is tradisjoneel in Augustus, op de zaoterdig van Sint Rosa, ’t Zittesj Vastelaovesleidjes Konkoer wobie de Marottesjlaager veur ’t nuuje sezoen wurt gekaoze. Door de corona-pandemie koosj dit jaor, sjus wie veurig jaor, ’t ZVK neit plaatsj vènje.
Om dit sezoen toch eine Vastelaovessjlaager te prizzenteiere, höbbe De Marotte de drie meis suksesvolle Zittesje tekssjrievesj Sjohn Smeets, Thei Wessels en Guus Steinen gevraog om same de sjlaager te sjrieve. Same wiste zie mèr leifs 22 Marottesjlaagesj op hunne naam te zette.
De nuuje Marottesjlaager, mit es tittel ‘De Zittesje Geis’ is op 11 Fibberwarie geprizzenteiert same mit de videoclip. De sjlaager wurt gezonge door Cyrille Niël, Paul-Jean Jessen, Paul Ruigt, Jan van Daal, Maike Frenken, Ron Hunnekens, Karin Colaris, Michelle Tummers, Chrissy Steinen, René en Thierry Dirkx en Max en Lisa Schiffler.
De videoclip van ‘De Zittesje Geis’ is te bekieke via YouTube en Social media. Bènnekort is de sjlaager taeves te beloestere via versjèllende streamingsdeinste es Spotify.
