Insjrieve veur deilname aan de Optoch

2022 Optoch

Nao drie jaor trèk op Vastelaoveszondig 27 Fibberwarie enjelik weier eine Vastelaovesoptoch door de sjtraote van Zitterd. Tot op dit moment sjtaon alle seine op gruin. ’t Optoch Kommitee Zitterd ongersjtraep waal dat ’t waarsjienlik geine optoch zal waere wie anger jaore. Dit es gevolg van de versjèllende maotregele en de zeer korte termien wo in 1111 zake georganezeiert en gereigeld motte waere.

Vanaaf noe kènne de carnavalisten zich via de website van ’t Optoch Kommitee Zitterd insjrieve veur deilname aan de optoch. De organezeierende sjtichting haop dat väöle zich conformeiere aan ’t häör motto van dit jaor: „Laot de Vastelaovend neit verrekke, doog alleney mit en laot de optoch trekke”.

„Laot de Vastelaovend neit verrekke, doog alleney mit en laot de optoch trekke”

Toezegginge
Ongertössje höbbe alle buurte en vereiniginge die eine waage höbbe geboewt aangegaeve dat zie mit hunne waage en grop mit zulle trèkke. Ouch versjèllende meziekgezelsjappe höbbe de organezase toegezag dat zie de optoch muzikaal zulle begeleide.

’t Optoch Kommitee Zitterd sjnap dat ’t kort daag is om es grop of enkeling ein leuk ongerwerp oet te wirke. Desondanks roupe ze alle carnavailsten op om de kommende daag hun inspirase en kreativiteit de vrieje loup te laote. Dit mit in gedachte ’t motto van dit jaor: ‘Laot de Vastelaovend neit verrekke, doog alleney mit en laot de optoch trekke!’

Veur de optoch maoge ouch kènjer (individueel of es grop) die normaal zouwe deilnumme aan de Kènjeroptoch zich aanmelje. Zie zulle apaart waere gezjureierd.

Aanmelje
Om de optoch gout te kènne organezeiere ruip OKZ deilnummes op om zich uuterlik donderdig 24 Fibberwarie 17.11oere aan te melje via de website van ’t Optoch Kommitee Zitterd https://www.optoch.nl/insjrieve

De Optoch zal Vastelaoveszondig sjtarte om 14.11oere. De definitieve route zal in de kommende daag bekend waere gemaak. De kommende daag zal ’t OpKZ sowieso jeederein op de heugte hawte van ’t pregram, de route en aktualiteiten rondje om de optoch.

Bron: Optoch Kommitee Zitterd
Foto: Optoch Kommitee Zitterd