Sjtadvastelaovesvereiniging De Marotte Zitterd haet weier hunne eige winkel geäöpend. De Marottewinkel 2.0 is te vènje in de kelder van Gijsen Zien en Horen aan ’t Tempelplien.
In taegesjtèlling pès anger jaore is in de Marottewinkel ein sjtökske extra belaeving te vènje en prizzenteiere De Marotte deierbare relikwieën. Zo wurt ’t prinsepak oet 1953 tentoongesjtèld mit daonaeve ein portret dat bienao zeventig jaor geleje woort gebroek bie de installase van de betreffende prins Heinz I (Laudy).
Ouch nuuj is eine mini-bioscoop wo gaste kènne geneite van awt beeldmateriaal. Zo waere onger mee beelde van ‘t 1×11 jaorig besjtaon van ‘t Optochkommitee en de ingebroekname van de auw optochhal in Ophaove geprojekteiert op ’t witte douk.
Naeve väöle deierbare relikwieën zeen ouch de gebroekelike dènger te koup es CD’s, pinkes, sjale en anger sjoon verzamelobjekte, zo es De Greutsje Pin.
Es geer de winkel van Gijsen op ’t Tempelplien bennelup en de trap omleeg pak, dan ventj geer de Marottewinkel. Jedere dónderdig en zaoterdig tössje 10.00 en 17.00 oere geäöpend.
Bron: De Marotte Zitterd
Foto: De Marotte Zitterd
