De Marotte Zitterd roupe dit jaor geine Sjtadsprins oet

2022
Sjtadsprins Thierry I krig dit jaor geine opvolger

Sjtadsvastelaovesvereiniging De Marotte Zitterd haet besjlaote om dit jaor geine Sjtadsprins oet te roupe.

Dit besjloet is genomme nao de coronaperconferentie van aafgeloupe vriedig. Versjèllende versoepelinge zeen aangekondig, mèr gaeve De Marotte weinig perspectief veur ein waerdig restant van ’t sezoen. Get dat de Wieze Raod essensjeel vònj bie de euverwaeging om waal of neit eine nuuje sjtadsprins oet te roupe.

Wie al eerder is bekend gemaak kieke De Marotte Zitterd veural nao wat waal kènt. Zo zal op 12 Fibberwari eine livestream zeen, wobie ein aantal fonkelnuuj dènger aan bod komme. Op dees datum onthulle De Marotte Zitterd namelik häör nuuj logo. Daonaeve zal de nuuje sjlaager ‘De Zittesje Geis’ mit videoclip waere geprizzenteiert. De nuuje sjlaager is gesjreve door Guus Steinen, Sjohn Smeets en Thei Wessels. Auch wurt tiejes dees livestream de nuuje Ridder in de Orde van de Pappegey oetgroupe en tot sjlot zal regeierend Sjtadsprins Thierry I waere geplök.

Wat betref ’t wiejere verloup van ’t sezoen is besjlaote dat ’t Kanon van ’t Balkon – onger veurbehoud – zal doorgaon. ’t Evenemènt zal dan waal in ein aafgesjlankte en meugelik alternatieve vorm plaatsjvènje.

Bron: De Marotte Zitterd
Foto: RBZitterd / vastelaovendzitterd