Sjtadvastelaovesvereiniging De Marotte Zitterd krig eine nuuje Vorst Marot. De huidige Vorst Marot Jan Janssen deit ein sjtepke trök en gaef de scepter euver. Ziene opvolger wurt zaoterdig 12 November tiejes de Alaaf-trap bekend gemaak.
Hiemit kump ein enj aan ’t tiedperk van Jan Janssen es Vorst Marot, dae in 2019 in tieje van crisis ‘in ’t deipe sjprong’. Nao jaore van conflicte tösje De Marotte Zitterd en häör perpluu-vereiniginge (Optoch Kommitee Zitterd, De Auw Prinse en Senaat) wis hae in 2020 ‘t tij dan toch te kere en zörgde hae d’r mit de neudige hulp veur dat de deipe en jaorelange vastelaovescrisis woort bezjwaore.
“Toen ich in 2019 de oetdaging aanging es Vorst Marot, wis ich dat mich eine enorme klus sjtong te wachte”, zaet Jan Janssen. “Achteraaf waar de oetdaging groter dan mien verwachting. Des te mee bèn ich greutsj en opgetaoge dat op dit moment de esjgrieze wolke baove ’t Marotteriek zeen verdwene”. “Ich zal miene opvolger wo neudig ongersjteune én bèn d’r van euvertuug dat hae de richtige man op de richtige plaatsj is”
Jan Janssen zal nog pès 8 jannewari aanblieve es Vorst Marot en zal nao aafloup van de Prinseresepse de scepter euverdrage aan ziene opvolger. Janssen blif daonao lid van de Wieze Raod van De Marotte Zitterd.
Bron: De Marotte Zitterd
Foto: RBZitterd / VastelaovendZitterd
