Benuimp pès Sjtadsprins van Zitterd 2023 is d’n heer Ruud Rousseau. Ziene hoogheid zal regeiere euver ’t Marotteriek en d’n eeuwen-awwe Zittesje Vastelaovend onger de naam Sjtadsprins Ruud II.
De oetruiping vònj plaatsj dit jaor veur ’t eesj plaatsj op de Mert. Uniek veur Zitterd is dat de aankommende Sjtadsprins dao zellef bie aanwezig waar. Veur de oetruiping maakte de es Pappegey gemaskerde Hoogheid zittend op ziene troon ein toch van de sjtaase pès de Mert, wobie hae woort begeleid door De Marotte, perpluu-vereiniginge en de Philhermenie. Aangekomme op de Mert woort de sjpanning nog verhoog mit optraës van Cyrille Niël, Swentibold mit Paul-Jean Jessen, De Philhermenie en Kartoesj en woorte ein aantal hints gegaeve euver de nuuje prins.
Om 21.11 oere waar ’t sjpannende moménent aangebraoke mit ’t veurlaeze van ’t tillegram van de Pappegey door Vorst Marot Jan Janssen. Onger applaus van de väöle aanwezige kwaam eine sjtaolende Ruud Rousseau sjtraolend onger ’t masker vandaan.
De 28 jaorige Ruud Rousseau is es zoon van Paul en Monique eine gebaore en getaoge Zittesje jong. Zien prinselik palis lègk aan de Mgr. Claessenssjtraot 37 in Zitterd. Zien kènjertied brach hae door op de Petrussjool om vervolges de sjtap te make van ’t Trevianum. Nao zien Havo-diploma ging hae de bachelors Technische bedrijfskunde en People & Business Management volge. Nao dees suksesvol te höbbe aafgerondj is hae momenteel wirkzaam es credit-controller bie chemiebedrief BRB in Ittervoort. Daenae sjpèngk hae aaf en toe bie in de chocoladezaak van ziene nonk.
Meziek is ein van de hobby’s van is de aankómmende Hoogheid. Zo is hae lid gewaes van hermenie Sint Joep en Kannonehel. Momenteel blees hae oppe trööt bie Sjtadskapel ’t Trumke en ’t Tröötje en de Zithaler. Op Vastelaovesgebied is hae aktief es waageboewer bie de buurt Riekswaeg Zuid.
Op gebied van sjport is Ruud is eine leifhöbber van karten en darts. Zien hart geit sjneller kloppe veur zien geleifde Fortuna Sittard. Zo geit geine thoeswedsjtried aan häöm veurbie en is hae ouch regelmaotig prezént bie oetwedsjtrieje om de club aan te moedige.
Ruud Rousseau wurt op tiejes de Plök & Vaerezitting op zaoterdig 7 Jannewari in ’t Toon Hermanstheater offesjeel geinsjtaleiert pès 90e Sjtadsprins van De Marotte Zitterd.
