Zo viert Zitterd Vastelaovend toes

2021

Dit jaor gein optochte, gein zittinge, gein sjoliere Vastelaovend, gein tröötekonkoer of Appelesienesjmiete, helemaol niks van Vastelaovend oppe sjtraot. Mèr de richtige Vastelaovesgek haet zeker ein alternatief plan in gedachte om toes toch Vastelaovend te vieren.

De Marotte zeen benuut wie de Marottinnekes en Marotte de Vastelaovend dit jaor noodgedwonge toes zulle viere. Ze roupe de luuj op om ein filmke van maximaal 2 menuut te make wie zie toes de Vastelaovend viere. Mail ’t filmke mit vermeljing van eure naam en adres uuterlik Esjelegounsdig 17 Fibberwarie nao filmkes@marotte.nl Ein sjurie geit alle filmkes beoordeile en veur de winnaar legk ein leuk priezepakket klaor.

Geer maag ’t filmke zo gek make es geer wilt, mèr d’r is eine belangrieke regel wo ’t filmke aan mot voldoon: Alles mot bènne de dan geljende RIVM maotregele! Went de veiligheid van jeederein sjteit veurop.

Veur de res: Bedènk get kreatiefs, sjik ’t filmke op nao De Marotte en maak kans op eine leuke pries.

Door deil te numme aan dees wedsjtreid gaef geer De Marotte ’t rech om de filmkes online op de website en/of social media te publiceiere.

Zeet geer benuut wie Sjtadsprins Thierry I de Vastelaovend viert in Coronatied? Bekiek dan ’t volgende filmke.

Bron: De Marotte Zitterd
Foto: Beeldfragment YouTube