Zittesje leidjes door nao de hauf finales van ’t LVK 2022

2022 Meziek

In ’t pregram ‘Plat Eweg’ op L1-Radio zeen door Henk Hover (L1) en Ron Aspers (LVK) de 44 leidjes bekend gemaak die door zeen nao de hauf finales van ’t LVK 2022. Bie dees 44 hauf-finaliste zitte twee leidjes oetkòmmend veur Zitterd.

Es eesjte is dat ‘t duo Jesse & Jesse (Paul-Jean Jessen en Tristan Jessen) mit ’t door Thei Wessels en Paul-Jean Jessen gesjreve leidje ‘Maske verplich!’. Jesse & Jesse sjtaon es nómmer 04 in de eesjte hauf-finale van ’t LVK.

De tweede Zittesje hauf-finaliste zeen de dames Kwebbel & Sjnebbel mit ’t door Guus Steinen gesjreve leidje ‘Veer zeen nog lang neit euver de datum haer’. Zie sjtaon in de tweede hauf-finale es nómmer 27.

De hauf finales van ’t LVK 2022 waere op vriedig 14 en 21 Jannewarie tössje 18.00 en 20.00oere oetgezonje via L1TV en L1 Radio en waere herhaalt op zaoterdig 15 en 22 Jannewarie tössje 13.00 en 15.00 oer.

Mee infermase euver ’t LVK en ein euverzich van alle 44 leidjes die door zeen nao de hauf-finales van ’t LVK 2022 is te venje op de websait van Stichting LVK.

Update:
Door de op dit moment geljende Coronamaotregele haet Stichting LVK besjlaote de hauf-finales en de finale te verplaatsje. De tiedsjtippe van oetzending volge.

Foto: Stichting LVK