Vastelaovesposter gemaak door Marij Heijligers

2021

De Limburgse Vastelaovesposter dae jaorliks wurt oetgebrach en door de ganse provincie gratis verkriegbaar is zal dit jaor door Corona neit waere oetgegaeve. Nao väöle reacties op ein door häör gemaak sjilderie besjloot Marij Heijligers oet Lömmerich om eine alternatieve Vastelaovesposter te make. Mit de lachende clown op ’t sjilderie wèlt Marij alles wat Vastelaovend is laote oetsjtraole en de luuj in dizzen tied aeve get positiefs gaeve. Daonaeve haop Marij dat de poster kènt zörge veur get gezèlligheid en kleur in de Limburgse sjtraote.

Mit hulp van ein drökkerie en versjèllende sjponsore zeen 1500 exemplare van de poster gedrök, die nao ein paar daag al bienao allemaol waere vergaeve. De vraog nao posters waar zo groot dat ouch de volgende drök van 1500 exemplare al sjnel waar oetgegaeve.

Op verzuik en in opdrach van De Marotte Zitterd zeen noe weier 1500 exemplare van de Vastelaovesposter gedrök. Dees posters zeen vanaaf daensdig 26 Jannewarie gratis verkriegbaar. Zeet d’r sjnel bie, wènt OP=OP!

De poster is aaf te haole op de volgende plaatsje: Albert Heijn Bröksjtraot, Albert Heijn Walsjtraot, Jan Linders Industriesjtraot, Jumbo Romeinesjtraot, Jumbo Dempseysjtraot, Jumbo Bremsjtraot, Nettorama Parallelwaeg en bie Plus Samaritaan.

Foto: Marij Heijligers
Bron: Marij Heijligers / De Marotte Zitterd