’t Pappegeyke vlug oet!

2021

Jaorliks versjient op de zaoterdig veur de Kènjeroptoch De Pappegey, ’t offesjeel jaorblaad van Sjtadvastelaovesvereiniging De Marotte Zitterd. Door Corona is dit jaor alles angesj, zo ouch de Pappegey. Dit jaor versjient d’r ein “Pappegeyke”, dat bie de luuj van Zitterd in de bös zal valle es bielage bie “Mijn Gazet”.

Saer de oprichting van De Marotte in 1881 is d’r bienao jeeder jaor eine Pappegey versjene. Ondanks dat dit jaor geine tradisjonele Vastelaovend gevierd kènt waere, maag de Pappegey ouch dit jaor neit ontbraeke. Waat kènt geer d’r in vènje? Wie-t geer gewènd zeet ein woord van Vorst Marot Jan I en van Sjtadsprins Thierry I, väöl ‘sjaelekal’ en anger leuke artikkele óm de kómmende Vastelaovesdaag mit door te kómme.

’t Eesjte exemplaar van ’t Pappegeyke is vriedig 5 Fibberwarie door Vorst Marot Jan I oetgereik aan wethouwer van Cultuur Andries Houtakkers. De wethouwer haet ein grote rol gehad bie ’t tot sjtandj komme van ’t Pappegeyke. ’t Oetvleige van ’t Pappegeyke vonj dit jaor plaatsj op ein waal heel bezunjere lokase, namelik de raodszaal in Gelaen! Ein bezunjer jaor vreeg om kreatieve oplossinge.

’t Pappegeyke zal same mit “Mijn Gazet” in ’t weekend van 6 en 7 Fibberwarie bie jeederein (zonger sticker) in de bös valle. Moch geer “Mijn Gazet” om waat veur rae dan ouch neit höbbe óntvange, ’t Pappegeyke is digitaal te laeze via de website van De Marotte Zittterd. Höb geer lever ein gedrök exemplaar? Sjik dan eine mail nao pappegey@marotte.nl. Sjrief hiebie eur adresgegaeves en dan zörge De Marotte dat geer veur de Vastelaovend ’t Pappegeyke in de bös vèndj.

Bron: De Marotte Zitterd
Foto: De Marotte Zitterd