Op vastelaoveszóndig 14 fibberwari haet Radio Nónnevot de eesjte Zittesje Vastelaoves Top 111 oetgezonje. De ruum 8 oere doerende laif marathonoetzending vanoet de Optochhal woort geprizzenteiert door Tom Jessen. In de oetzending ware versjèllende bekende Zitterder laif te gas en konne loesteraers ‘ein tuut Nónnevotte’ wènne.
Op nómmer 1 in de eesjte Zittesje Vastelaoves Top111 eindige ’t Haw zo sjoon kènne zeen’, gezonge door Cyrille Niël. De tittel van de door Sjon Smeets en Gian Prince gesjreve jubbelei sjlaager oet 2003 zaet alles euver de Vastelaovend 2021. Op de tweede plaatsj eindigde ‘Zitterd Allein’ van Jo Erens, door väöle gezeen es ’t Zittesj Volksleed. Op de driede plaatsj eindigde de door Jeun Schelberg gesjreve evergreen ‘De Prinsedruim’.
De komplete Zittesje Vastelaoves Top 111 van 2021 is te bekieke op de website van Radio Nónnevot, wo ouch de kompete oetzending is trök te kieke.
Radio Nónnevot zal nog oetzende pés Vastelaovesdaensdig, wonao de zender oet de loch zal gaon. De initiatiefnummesj höbbe al aangegaeve dat nao ’t sukses van dit jaor Radio Nónnevot volgend jaor weier trök zal komme.
Foto: Radio Nónnevot
