Radio Nónnevot hulp uch de vastelaovend door!

2021

Radio Nónnevot is in crisistied gebaore es ein ideeke óm toch nog get Vastelaovessjtömming ónger de luuj te brènge mer óngertössje in mènnige hoeskamer al neit meer weg te dènke.

Op Vastelaoveszóndig 14 fibberwari geit Radio Nónnevot ein sjoon pregram prizzenteiere mit de Top111 van de bèste Zittesje Vastelaovesleidjes. Tom Jessen zal vanoet de Optochhal eine 8 oer doerende marathon aan plaetjes veur uch dreeje. Dat kènt geer, naeve oppe radio, ouch op FaceBook en YouTube live volge es geer wilt. Raozende reporter Sam Verbeek maak inmiddels al opnames bie bekènde en awt bekènde Zitterder die dan te heure zeen en ènkele gaste zalle coronaproof nao de hal kómme óm hun anekdotes te vertèlle.

Sjtöm veur zóndig 7 fibberwari via www.radiononnevot.nl. Maak hie op eure eige perseunlikke top vief kènbaar. Oet alle reacties volg dan es van zellef de eesjte Top111 van ’t Zittesje vastelaovesrepertoire. Inmiddels zeen d’r al meer es 350 sjtömme oetgebrach!

Dus wo’t geer dees daag ouch zeet in opmarsj nao oos Vastelaovesdaag die gans angesj oet zalle zeen, vuil uch dan mit jederein verbónje middels al dae sjone meziek dae Zitterd in al die jaore biejein haet gebrach.

Gank nao radiononnevot.nl en download de app. Hang de verseiering op, haol Zittesje nónnevotte in hoes, ein pilske of jónge klaore en laot de Vastelaovend tot eur verbeelding sjpraeke middels de tone die Zitterd nog kènt! Wènt, waat einmaol d’r in zit, geit d’r nootsj meer oet!

Bron: Persberich Radio Nónnevot
Foto: Radio Nónnevot