Zaoterdigaovend 27 November zeen bie De Vief Heringe in Zitterd 8 nuuj lede geinsjtalleiert pès lid van De Wieze Raod van Sjtadsvastelaovesvereiniging De Marotte Zitterd.
De nuuj lede zeen in alfabetische volgorde Lejao Beursgens, Harrie Horn, Maurice Indemans, Léon Kaminski, Sjef Schurgers, Marc Verblakt, Sam Verbeek en Patrick Werdens. Maurice Indemans woort nao zien insjtallase door Vorst Marot Jan I benuimp pés sirremoniemeister. Hae nump de veur häöm neit onbekende sirremoniemeistersjtaaf euver van Reinhard Wind. Patrick Werdens zal bènne De Marotte de funksie van Protokolis gaon vervulle.
Same mit Guido van Haen, Maurice Meijers, Peter Schaeks, Wil Simons, Mark Willems, Reinhard Wind, Jos Zillekens en Vorst Marot Jan Janssen zeen De Marotte Zitterd noe weier op volle sjterkte.
Mit ’t aantraë van de 8 nuuj lede kènt volges Vorst Marot Jan I ein vervaelende periode waere aafgesjlaote en kènt alle aandach weier op de Vastelaovend waere gerich. Al is door de aanhawtende coronapandemie op dit moment nog onzeker wie de in Vastelaovend 2022 geviert kènt gaon waere.
Foto: Marion Willemsen
Berich via sittard-geleen.nieuws.nl
