De Laammaekesj presenteiere: “Zitterd Sjittert”

2022
De Laammaekesj mit de nuuj Zittesje Vastelaovesvaan

Opgerich in Coronatied en dao door beperk in de meugelikhede veur ‘t organiseiere van leuke evenemènte, zeen De Laammaekesj super greutsj dat zie èntjelings hun eesjte evenemènt maage presenteiere: “Zitterd Sjittert”. Ein muzikale reis veur en door Laammaekesj.

“Zitterd Sjittert” is dan auch de aaftrap van ein reeks gezellige muzikale momente, wobie Zittesje artiste, hun favoriete leidjes zènge in het Zittesj. De eesjte twee van dees momente zölle plaatsj vènje op Zaoterdag 29 Januari 2022.

‘t Belaof twee heerlike “shows” te waere, wobie geer kènt geneite van ‘t bèste wat Zitterd te beije haet op muzikaal gebied. Neemes minder dan Esther van Cleef, Paul-Jean Jessen, Cyrille Niël, Fieny Cals, Paul Ruigt en Jan van Daal zènge op deze aovend hun favoriete nómmesj in ‘t Zittesj. Dit alles ónger de bezielende muzikale begeleiding van, ein aafvaardiging van, de Zittesje band: Loose!

Geer kènt bie “Zitterd Sjittert” geneite van alom bekende Zittesje klassiekers, pès wereld hits, wo tekste in ‘t Zittesj op gemaak zeen. De aovend wurt op ein ludieke wieze gepresenteierd door neemes minder dan Nicole Schurgers.

“Zitterd Sjittert” zal plaatsj vènje op Zaoterdig 29 Januari in De Vief Heringe aan de Molenwaeg te Zitterd. De aanvangk van de eesjte show is om 16.00 oere en de tweede om 20.30 oere.

Kaartverkoup:
Toegangs kaarte koste €20.- per persoon inklusief ein borrelplenkske en ein drenkske. Wilt geer der nao/der veur ein lekker hepke aete? Dan verzörg De Vief Heringe om 18oere ‘t Laammaekesj buffet.
De kaarte, veur zowaal Zitterd Sjittert es ‘t Laammaekesj buffet, zeen vanaaf 22 Oktober – 11.11 oere oetsjloetend verkriegbaar via de website van De Laammaekesj: www.delaammaekesj.nl/winkelke

‘t Sjprik veur zich dat deze aovend de Corona reigels waere gevolg die op dat moment van toepassing zeen. Mee infermase kènt geer auch vènje op de website van De Laammaekesj: www.delaammaekesj.nl

Bron: Stichting De Laammaekesj
Foto: Stichting De Laammaekesj