Alternatief Sjöttefees op zòndig 5 September

2021

Zòndig 5 September véngk veur de 47e keer ‘t Alternatief Sjöttefees ‘Vogelsjeite’ plaatsj. Aafgeloupe jaor koosj ‘t Alternatief Sjöttefees door de lockdown neit doorgaon. Dit jaor kènt ’t sjöttefees, onger sjtreng veurwaarde en ein aantal beperkinge, waal doorgaon. Omdat ’t fees allein maag plaatsjvènje op ein besjlaote terrein kènt dit jaor geine optocht trèkke door de bènnesjtad.

De nuuj lokase van ’t feesterrein is d’n haof van de Zöstesj Karmelitessen oppe Kolleberg. De deilnummende “sjötterieje”, die veural besjaon oet Zittesje (Vastelaoves) vereiniginge en Zittesje kapelle prizzenteiere zich tössje 13.00 en 14.30oere bie ’t defilé op ein ludieke meneier aan de zjurie en Keizer Tim Köhlen van kapel Aafsjlaag Zitterd. Nao aafloup van ‘t defilé begint om 15.00oere ‘t Keuningssjeite. In de tweede sjeitrunje sjtrieje alle keuninge taegen-ein om de Keizerstitel.

Keizersfees
Op 4 September, de zaoterdigaovend veuraafgaond aan ’t Alternatief Sjöttefees, vèngk ‘t tradisjoneel Keizersfees plaatsj. Dit jaor wurt ’t Keizersfees georganezeiert door kapel Aafsjlaag Zitterd ter eere van hunne Keizer Tim Köhlen. ’t Keizersfees in ‘Western-sjtiel’ vèngk net es ’t Alternatief Sjöttefees plaatsj in d’n haof van de Zöstesj Karmelitessen oppe Kolleberg. Tössje 18.30 en 20.00oere is ein resepse en aansjloetend eine Western-feesaovend mit meziek van ‘Pint Beastwood en DJacky. Mee infermase euver ’t Keizersfees via de facebouk pagina van kapel Aafsjlaag Zitterd.

Coronamaotregele
Zowaal bie ’t Alternatief Sjöttefees op zòndig es ’t Keizesjfees op zaoterdigaovend wurt gewirk mit ’t principe van ‘testen voor toegang’. Veur jeedere deilnummer en bezuiker geldt dat ein geldig vaccinatiebewies (de QR-code oet de Corona App), ein tes-bewies van maximaal 24 oer awt óf ein herstelbewies neudig is om bènne te kómme. Dit zörg mit ein geljig legitimatiebewies en ein (gratis) toegangsbewies veur toegangk pès ’t terrein.

Om de veiligheid te waarborge is ’t neit toegesjtaon om ’t terrein op en aaf te loupe. Einmaol ’t terrein verlaote kènt me neit mee trök nao bènne.

Toegangskaarte
Door de coronamaotregele van de euverheid is ein toegangskaart verplich veur deilnummesj en bezuikesj van ’t Alternatief Sjöttefees en ’t Keizersfees. Dit i.v.m. mit ein maximaal aantal bezuikesj. Dees toegangskaarte zeen gratis verkriegbaar.

Wèlt geer ’t Alterantief Sjöttefees op zòndig bezuike?
Sjik dan eine e-meel nao vogelsjeite.sasz@gmail.com. Vermeldj in dizzen e-maal eure naam en nao welk e-meeladres de toegangskaart mot waere gesjik. Mit dees toegangkaart én geljig coronabewies kènt geer zòndig tössje 13.00 en 15.00oere ‘t terrein op.

De gratis toegangskaarte veur ’t Keizersfees op zaterdigaovend zeen te besjtèlle door eine e-mail te sjikke  nao secretariaataz@gmail.com. Vermeld in dizzen e-meel ’t aantal toeganskaarte dat geer wèlt besjtèlle én de naame van de luuj dit nao ’t Keizesjfees komme. Geer ontvangk dan eine e-meel mit de toegangskaarte en alle infermase.

Bezuike van ’t Alternatief Sjöttefees én ’t Keizesjfees is allein muigelik mit ein geljig toegangsbewies én ein geldig vaccinatiebewies (de QR-code oet de Corona App), ein tes-bewies van maximaal 24 oer awt óf ein herstelbewies.

Mee infermase:
Alternatief Sjöttefees Zitterd
Keizersfees Kapel Aafsjlaag Zitterd

Bron: Facebook Alternatief Sjöttefees / kapel Aafsjlaag Zitterd
Foto: VastelaovendZitterd – RBZitterd