Zittesje Vastelaovesmeziek digitaal

Meziek heurt bie Vastelaovend. Zeker dit jaor wo Vastelaovend gans angesj zal zeen, kènt meziek toch ‘t Vastelaovesgevuil brènge. Same of allein loestere nao Vastelaovesmeziek thoes oppe bank, op ’t wirk of geweun ongerwaeg.

Wo in vruiger jaore Vastelaovesleidjes en angere meziek woort opgenomme op LP’s en later op CD’s, is ‘t taegeweurdig mee en mee gebroekelik dat meziek ouch digitaal wurt oetgegaeve. Op bekende streamingsdeinste es Spotify, Deezer en Apple Music zeen ongertösje al väöle Zittesje Vastelaovesleidjes te beloestere.

Spotify playlist
Op Spotify is ein playlistVastelaovend in Zitterd te vènje mit ein verzameling aan ruum 8oere aan Zittesje Vastelaovesmeziek. In dees zeen leidjes te vènje van ein aantal CD’s van De Marotte Zitterd, Zittesje Vastelaovessjlaagesj en Vastelaovesleidjes van versjèllende Zittesje artiste.

De playlist is te vènje onger aan dit berich of door in Spotify te zuike nao ‘Vastelaovend in Zitterd’.
Let op: Meziek loestere via Spotify is allein muigelik mit ein gratis of betaald account. Mee infermase hiejeuver is te vènje oppe website van Spotify

Vastelaovesleidjes oet de 50er en 60er jaore.
Stadscarnavalsvereniging De Marotte Zitterd brènge al jaore LP’s en taegeweurdig CD’s oet mit dao op de wènnende sjlaagesj van ’t sezoen. Veural op de in d’n tied van de LP’s zeen väöle leidjes opgenomme wo mènnig Zitterder mit is groot gebrach. Leidjes die bienao jeederein waal kènt, mèr bienao neit mee te heure zeen.

Onger ’t motto ‘Trök nao vervlaoge tieje’, höbbe De Marotte ein reeks leidjes van o.a. ’t Marotte Trio oet de 50er en 60er jaore digitaal geremasterd. Dees leidjes zeen op de website van De Marotte geplaatsj en zeen veur jeederein neit allein gratis te beloestere, mèr ouch gratis te downloade.