Wae sjrif de Marottesjlaager 2021?

Terwiel de Coronacrisis veurluipig nog es ein duustere wolk (ouch baove Zitterd) blif hange wurt ’t toch weier tied om veuroet te kieke nao ’t nuut Vastelaovessezoen. Tiejes ’t Zittesj Vastelaovesleidjes Konkoer (ZVK), de jaorlikse leidjesaovend van Sjtadsvastelaovesvereiniging De Marotte Zitterd, op zaoterdig 29 Augustus 2020 wurt de Marottesjlaager 2021 gekaoze.

Veurwaarde
De Marotte Zitterd neudige (Zittesje) componiste en tekssjrievesj oet om ein Zittesje Vastelaovessjlaager te componeiere veur ’t Vastelaovessezoen 2021. De opvolger van de door Phil Schaeken gesjreve sjlaager 2020 ‘Mènnigmaol roup ich alaaf’ van René Dirkx mot voldoon aan de volgende veurwaarde:

  • De meziek en teks motte orzjineel zeen, maoge neit eerder in ‘t aopebaar ten geheure zeen gebrach en deint gemaak te zeen mit de intensie om deil te numme aan ’t Zittesj vastelaovesleeidjes Konkour 2020.
  • De teks mot in ’t Zittesj-plat gesjreve en/of gezonge zeen.
  • De meziek deint in noote-sjrif genoteiert te zeen. Bie veurkeur in ‘Sibelius’. De teks mot onger de melodielien waere gesjreve.
  • De teks deint taeves apaart es Word-besjtand aangelevert te waere.
  • ‘t Document deint van naam, adres, tillefoonnómmer(esj) en e-mailadres(se) van de tekssjriever en/of componis te zeen veurzeen.
  • Daonaeve vraoge De Marotte Zitterd om de inzending te veurzeen van ein korte oetlègk in een Word-besjtand euver ’t leidje om de sjurie ein baeter inzich en gevuil te gaeve bie de sjlaager.
  • ’t Is per sjriever/componis toegesjtaon om ein onbeperk aantal leidjes in te sjikke, ouch in combenase mit versjèllende componiste en/of tekssjrievesj. Nuuj dit jaor is dat ’t muigelik is om mit meerdere leidjes door te dringe pès de finale. De 11 finalewaerdige beste leidjes waere dao ten geheure gebrach.

Veurseleksie
Zo es gebroekelik vèngk bie mee es 11 inzendinge ein veurseleksie plaatsj. Door de Coronacrisis is ’t neit muigelik om hieveur ein biejeinkoms de organezeiere. De Marotte Zitterd haet daorom besjlaote om vakmuzikante oet de Vastelaoveswelt, o.a. besjtaonde oet componiste, tekssjrievesj en (auwt) zengesj oet de ganse provincie hun oordeil te laote gaeve euver de inzendinge. Zie kriege begin juli eine orkesbandj dae is ingezonge thoes gesjtuurd mit ein beoordeilingsformuleier. Dees oetsjlaag is taeves de definitieve oetsjlaag van de vakzjurie.

Finale
In de tweede of driede waek van Juli waere de 11 finaliste bekend gemaak. Aangezeen ’t ongertössje duujelik is dat de finale op de zaoterdig van Sint Rosa neit door kènt gaon op de gebroekelikke meneier in de Sjpeigeltent, wurt door De Marotte Zitterd hel gewirk aan ein alternatief, wo euver bènnekort mee infermase zal waere bekend gemaak. Bie dit alternatief sjteit de gezondjheid van jeederein veurop conform de maatreigele van de regeiering en ’t RIVM.

De inzending deint uuterlik op maondig 15 juni 2020 ingeleverd te zeen per mail of postbus van De Marotte Zitterd.
Postbus: De Marotte Zitterd, Postbus 256, 6130 AG Zitterd of via e-mail: reinhard.wind@Marotte.nl

Bron: De Marotte Zitterd
Foto: Arjan Krijntjes