Vastelaovesoptochte 8 Meert AAFGELASJ

2020 Optoch

De veur zondig 8 Meert geplande gecombineierde Kènjeroptoch en Groote Vastelaovesoptoch is door ‘t Optoch Kommitee Zitterd esnog AAFGELASJ.

Naodat zowaal de Kènjeroptoch es de Groote Vastelaovesoptoch door de sjtorm ware aafgelasj, haw ’t Optoch Kommitee gehaop dat eine sjoone en veur Zitterd representatieve optoch op zondig 8 Meert esnog door de sjtraote van Zitterd zaw trèkke.

De aafgeloupe daag haet ’t Optoch Kommitee väöle aafmeldinge, mit tal van oeteinloupende rae, ontvange van deilnummesj.  Ein van dees rae waar de angs veur ‘t Corona-virus, mèr ouch ’t dalende animo onger deilnummesj. Dao kwaam nog èns bie dat sjolekoepel ‘Kindante’ aan de aangesjlaote sjole ein negatief haet gegaeve veur deilname aan de optoch.

Door de väöle aafmeldinge is ‘t Optoch Kommitee Zitterd van meining dat geine veur Zitterd representatieve optoch zou kenne trekke. Daorom is ’t jaomerlikke besjloet genomme om de optoch definitief aaf te lasje. Door dit besjloet zal Vastelaovend 2020 de buik in gaon es ein jaor zonger Optochte.

Taeves haet ‘t Optoch Kommitee laote weite dat de veur 14 Meert geplande film- en naokaartaovend aeveneins neit zal doorgaon.

Bron: Optoch Kommitee Zitterd
Foto: VastelaovendZitterd – RBZitterd