Finale 11e Tiener Vastelaovesleidjes Konkour

Zaoterdig 25 Jannewari is in Steyl-Tegelen de finale van ’t 11e Tiener Vastelaovesleidjes Konkour (TVK). ’t TVK is de zuiktoch nao ’t beste Vastelaovesleidje veur en door de tienesj van Limburg. Vernuujende Vastelaovesmeziek, power, enerzjie, up tempo, experimenteel en angesj, dat is kènmerkend veur ’t TVK.

Dit jaor sjtaon 17 deilnummesj in de finale die op jach gaon nao de winst in ‘t 11de Tiener Vastelaovesleidjes Konkour. Rondj middernach zal de winnaar van ’t bèste Tienerleidje 2020 van Limburg waere bekendgemaak. De aafgeloupe twee jaor ging de wins nao Verrèkkes Moj oet Venray. Naeve de optraës van de finaliste zal d’r de ganse aovend show, meziek en extra entertainment zeen veur de tienesj.

Bie de 17 finaliste zitte oetkommend veur Zitterd de veier mechelkes van Veier-G mit ’t leidje ‘Neit te sjtoppe!’. Zie sjtaon veur ’t tweede jaor op riej in de finale van ’t TVK. Hie onger sjtèlle de mechelkes van Veier-G zich veur.

Bès doe ouch neit te sjtoppe?
Veer zeen Jada, Jolie, Myrthe en Tess, veier gezèllige mechelkes oet Zitterd en nuime ós Veier-G. Veer zeen 14 jaor jonk en zitte alleney op 3 Havo van ‘t Trevianum in Zitterd. Same kènne v’r ‘t goud mitein vènje en zènge en danse gaer.
Vastelaovend is veur ós väöl sjpas en lol make (laemmake zaet me in Zitterd) en zeen mit de vastelaovesdaag neit te sjtoppe. Veer danse en zènge ’t leifs drie daag lank aan ein sjtök door. Veurig jaor deige veer veur ’t eesj mit aan ‘t TVK en dat sjmaakde nao meer. Veer vènje ‘t weijer hartsjtikke tof om mit ós leidje ‘Neit Te Sjtoppe!‘ in de finale sjtaon.
Veer höbbe d’r in jeder geval weijer keiväöl zin in en zeen ech NEIT TE SJTOPPE!

Ein samevatting van de finale van ’t TVK 2020 zal op zaoterdig 1 Fibberwari op L1 TV waere oetgezonje. Mee infermase euver ’t TVK is te vénje op de website van ‘t TVK-Limburg en op de faceboukpagina van ’t TVK.

Veer wunsje de mechelkes van Veier-G en alle angere deilnummesj väöl plezeier en sukses in de finale.

Bron: website TVK-Limburg
Foto: beeldfragment YouTube / TVK-Limburg